Miðflokkurinn tapaði 16 milljónum króna á árinu 2017, samkvæmt útdrætti úr ársreikningi sem Ríkisendurskoðun hefur birt. Skuldir flokksins voru um 17 milljónir króna í árslok 2017 og eigið fé neikvætt um 16 milljónir.

Miðflokkurinn var formlega stofnaður í fyrra og hlaut framboðið tæp 11 prósent atkvæða í Alþingiskosningunum 2017. Sigmundur Davíð Gunnlaugsson, fyrrverandi forsætisráðherra, fór fyrir stofnun flokksins eftir að hann gekk úr Framsóknarflokknum í kjölfar uppljóstrana sem fram komu í Panamskjölunum.

Rekstur flokksins kostaði alls 27,5 milljónir á árinu, en tekjur hans námu 11,8 milljónum króna í formi framlaga lögaðila og einstaklinga, auk ríkisframlaga.

Miðflokkurinn fær 71,5 milljón frá ríkissjóði í ár

Lögaðilar styrktu flokkinn um tæpar 7 milljónir króna á árinu. Fyrirtækin Brim, Tandraberg, Óshöfði, Kvika banki, Thorfish, Síminn, HB Grandi og Hafblik styrktu öll flokkinn um 400 þúsund krónur hvert. Fyrirtæki í sjávarútvegi voru áberandi í hópi styrktaraðila, en einstaklingar styrktu einnig flokkinn um tæpar 2 milljónir króna samtals með framlögum upp á 200 þúsund krónur eða minna á mann.

Loks fékk flokkurinn 3 milljónir króna frá ríkissjóði í kosningaframlag. Ljóst er að flokkurinn mun fá enn hærra framlag frá ríkinu í ár, þar sem fjárframlög til flokkanna á Alþingi voru hækkuð um 127% um áramótin. Mun Miðflokkurinn fá 71,5 milljón króna í slík framlög á árinu 2018.