Sigurfreyr Jónasson, talsmaður Vakurs – samtaka um evrópska menningu, hafði samband við breska þjóðernissinnann og hægriöfgamanninn Tommy Robinson þann 25. maí síðastliðinn og stakk upp á því að Tommy kæmi í óvænta heimsókn til Íslands og stæði sjálfur straum af kostnaðinum. Þannig gæti Tommy bætt fyrir þann skaða sem hann olli með því að hætta við Íslandsför og fyrirlestur sem hann hugðist flytja hérlendis í sumarbyrjun.
Greint er frá þessu á lokuðum umræðuhópi íslenskra stuðningsmanna Tommy Robinson á Facebook. Þar er bréfið sem Sigurfreyr sendi Tommy og samstarfskonu hans birt í heild. „Ég þarf varla að segja þér að vinstrimenn eru sigri hrósandi yfir því hvernig fór með viðburðinn. En ekki er öll von úti. Það er til leið til að kippa þessu í lag,“ skrifar Sigurfreyr [bréfið er skrifað á ensku, þýðingin er blaðamanns].
Brýnt að styrkveitendur og sjálfboðaliðar fái að hitta Tommy
Bréfritari útskýrir hugmynd sína með eftirfarandi hætti:
„Þú gætir komið í sumar (seinni hluta júní, fyrri hluta júlí eða í ágúst, því fyrr því betra en þó ekki of snemma í júní) í „óvænta heimsókn“ til Íslands. Þú og þitt fólk gætuð komið, á eigin kostnað, í þrjá daga. Á fyrsta degi myndirðu veita þau viðtöl sem fyrirhuguð voru (myndbandsviðtal við DV og útvarpsviðtal á Harmageddon) og jafnvel eitt í viðbót sem ég gæti komið í kring. Á öðrum degi gætirðu flutt fyrirlesturinn, sem stóð til að yrði fluttur á ráðstefnunni, með beinu streymi á Facebook og Twitter sem yrði tilkynntur í fjölmiðlaviðtölunum daginn áður og auglýstur á Facebook. Og á þriðja degi gætirðu hitt fólkið sem veitti fjárstyrki og varði tíma sínum í sjálfboðavinnu vegna viðburðar sem aldrei varð að veruleika.“
Sigurfreyr segir að Tommy Robinson þyrfti einvörðungu að greiða fyrir hótelgistingu, framfærslu og flug frá Lúton. Vakur geti útvegað bílstjóra og „með því að leigja ekki ráðstefnusal heldur aðeins streyma ræðunni á netinu gætum við sparað umtalsverðar fjárhæðir“. Tekur hann fram að kostað hafi 462 þúsund krónur að leigja salinn á Grand Hótel.
Enginn myndi auglýsa Tommy
Tommy Robinson olli aðdáendum sínum miklum vonbrigðum þegar hann afboðaði komu sína til Íslands fyrirvaralaust þann 16. maí síðastliðinn. Aðstoðarmaður Tommys greindi Sigurfrey frá því að Tommy kæmi ekki vegna dauðsfalls í fjölskyldunni. „Ég vil vita hver dó,“ sagði þá Sigurfreyr í viðtali við DV eftir að hafa beðið eftir Tommy í tvo klukkutíma á Keflavíkurflugvelli.
„Ég vil vita hver dó“
Svo virðist sem sárin hafi ekki gróið til fulls. Að minnsta kosti ber Sigurfreyr afar takmarkað traust til Tommys og skrifar: „Heimsóknin yrði ekki auglýst fyrirfram. Enginn vill gera það ef þú skyldir aftur hætta við að koma. Hins vegar er ljóst að um leið og þú kemur til landsins mun fiskisagan fljúga. Með þessu gætum við endurheimt traust og þú gætir gert bragarbót á sambandi þínu við aðdáendahóp þinn hér á Íslandi. Þetta gæti einnig bætt fyrir þann skaða sem atburðir síðustu missera hafa haft á þau jákvæðu áhrif sem heimsóknir Roberts Spencer og Christine Williams höfðu á Íslandi, þótt því miður hafi heimsóknirnar orðið þeim báðum dýrkeyptar eins og þú hlýtur að vita.“ Vísar þar Sigurfreyr líklega til ásakana um að eitrað hafi verið fyrir afturhaldsmanninum Roberti Spencer á Íslandi.
Tommy losnaði úr fangelsi
Talsmaður Vakurs hvetur Tommy Robinson til að íhuga alvarlega þær hugmyndir sem eru settar fram í bréfinu. „Við verðum að taka á þessu með faglegum hætti, halda áfram og snúa vörn í sókn.“
Tommy hefur gegnt forystuhlutverki í þjóðernissamtökunum The English Defence League, var um tíma varaformaður Breska frelsisflokksins og nýtur mikillar virðingar meðal rasista, múslimahatara og hægriróttæklinga í Evrópu og Bandaríkjunum.
Tommy Robinson losnaði úr fangesi í gær þegar áfrýjundardómstóll úrskurðaði um að annmarkar hefðu verið á málsmeðferðinni þegar hann var dæmdur til þrettán mánaða fangelsisvistar fyrir að taka myndir af sakborningum í kynferðisbrotamálum og lítilsvirða þannig breskan dómstól. Áður hefur Tommy setið í fangelsi fyrir fjársvik og að villa á sér heimildir en jafnframt verið dæmdur til að sinna samfélagsþjónustu vegna ógnandi hegðunar eftir íþróttaviðburð í heimabæ sínum, Luton, þar sem Tommy hefur rekið ljósabekkjastofu.
Nú, þegar Tommy er frjáls ferða sinna, ætlar Vakur að ítreka boð sitt til hans. „Látum ykkur vita hvað kemur út úr því,“ segir talsmaður Vakurs á lokaða spjallhópnum. „Heimsókn Tommy Robinson til Íslands er ekki lokið enn. Bara fyrri hálfleikur búinn.“
Athugasemdir