Þórdís Kolbrún Reykfjörð Gylfadóttir, ferðamála-, iðnaðar- og nýsköpunarráðherra, tekur ekki undir það sjónarmið Samtaka ferðaþjónustunnar og fleiri aðila að með hvalveiðum við Íslandsstrendur sé verið að fórna meiri hagsmunum fyrir minni.

„Ráðherra er ekki kunnugt um að sýnt hafi verið fram á það,“ segir í svari ráðherra við fyrirspurn Þorgerðar Katrínar Gunnarsdóttur, formanns Viðreisnar, um málið. 

Einar Sveinsson, fjárfestir og föðurbróðir Bjarna Benediktssonar fjármálaráðherra, tók nýlega við stjórnarformennsku í Hval hf, en um er að ræða eina íslenska fyrirtækið sem veiðir langreyðar. 

Ríkisstjórnin hefur sætt harðri gagnrýni undanfarna daga eftir að greint var frá því að hvalveiðimenn á vegum fyrirtækisins hefðu drepið fágæta skepnu, en ekki hefur fengist úr því skorið hvort um steypireyð eða blending var að ræða. Sautján vísindamenn víðsvegar um heim skoruðu á Íslendinga í gær að kyrrsetja hvalveiðiflotann meðan málið væri rannsakað. 

Ekki ríkir einhugur um hvalveiðar innan ríkisstjórnarinnar. Katrín Jakobsdóttir forsætisráðherra sagði nýlega í svari við fyrirspurn Stundarinnar að hún hefði miklar efasemdir um að hvalveiðar væru réttlætanlegar út frá umhverfis-, samfélags- og efnahagslegum sjónarmiðum. Kristján Þór Júlíusson, sjávarútvegs- og landbúnaðarráðherra, hefur hins vegar lagst gegn því í svari við fyrirspurn Þorgerðar Katrínar Gunnarsdóttur á Alþingi að hvalveiðistefna Íslands verði endurmetin. 

„Sjávarútvegs- og landbúnaðarráðherra hefur falið Hagfræðistofnun Háskóla Íslands að gera úttekt á þjóðhagslegu mikilvægi hvalveiða og áhrifum þeirra á aðrar atvinnugreinar,“ segir meðal annars í svari Þórdísar Kolbrúnar við fyrirspurn Þorgerðar Katrínar um málið.

Aðspurð hvort hún sé hlynnt því að hvalveiðistefna Íslendinga verði endurmetin svarar ráðherra: „Stefna Íslands í hvalveiðimálum hefur byggst á því meginsjónarmiði að viðhalda rétti þjóðarinnar til að nýta auðlindir hafsins með sjálfbærum hætti á grunni vísindalegrar ráðgjafar. Fyrir liggur að endurmat á hvalveiðum mun fara fram þegar núverandi fimm ára veiðitímabili lýkur við lok þessa árs.“