„Ef ég verð sendur til baka verð ég í mikilli hættu,“ segir Mohamed Sabir, kúrdískur hælisleitandi á Íslandi sem nýlega kærði ákvörðun Útlendingastofnunar um að synja honum alþjóðlega vernd til kærunefndar útlendingamála. Hópur fólks kom saman fyrir utan dómsmálaráðuneytið í dag og mótmælti synjun á umsókn hans og sex annarra Kúrda. 

Mohamed Sabir

Mynd: Diljá Sigurðardóttir

„Útlendingastofnun hefur þegar hafnað okkur og við bíðum niðurstöðu áfrýjunar,“ segir Mohamed. „Ef okkur verður hafnað aftur þá verðum við sendir beint til Íraks. Írak er ekki öruggt land. Við flúðum þaðan hver og einn úr mismunandi aðstæðum. Við þekkjumst ekki en erum allir frá Kúrdistan.“

„Írak er ekki öruggt land.“

Kúrdistan nær yfir svæði innan Írak, Sýrlands, Íran og Tyrklands þar sem Kúrdar eru í meirihluta. Svæðið hefur ekki farið varhluta af Sýrlensku borgarastyrjöldinni og skæruhernaði ISIS á undanförnum árum. Nú síðast í janúar réðist tyrkneski herinn inn í Afrin hérað í norðurhluta Sýrlands. Eins og fram hefur komið er talið að Íslendingurinn Haukur Hilmarsson hafi fallið í árásum Tyrkja á svæðinu í lok febrúar, en þar tók Haukur meðal annars þátt í baráttu Kúrda gegn hryðjuverkasamtökunum ISIS.

Mohamed vann í olíuiðnaðinum í Kúrdistan en segir ástandinu hafa hrakað með uppgangi ISIS árið 2014. „Ég vann þar í næstum níu ár en eftir þetta vildu viðskiptavinir og fyrirtæki fara af svæðinu af ótta um öryggi sitt,“ segir Mohamed. „Ég á fjölskyldu, tvö börn sem eru enn í Norður-Írak.“

Hver umsókn skoðuð sérstaklega óháð upprunalandi

Mennirnir sjö afhentu í dag starfsfólki dómsmálaráðuneytisins undirskriftarlista og kröfðu mótmælendur stjórnvöld um að stöðva fyrirhugaðar brottvísanir. Með undirskriftunum er farið fram á að Ísland brottvísi ekki flóttafólki til Írak og Kúrdistan, sem eru stríðshrjáð svæði.

Að sögn Þórhildar Óskar Hagalín, upplýsingafulltrúa Útlendingastofnunar, er hver umsókn um alþjóðlega vernd skoðuð sérstaklega sama frá hvaða ríki einstaklingur kemur. „Það gildir um þessi lönd eins og önnur að þegar umsókn um hæli er lögð inn er lagt mat á það hvort ástæður og skilyrði alþjóðlegrar verndar séu uppfyllt, sem eru ofsóknir,“ segir Þórhildur. „Það er litið til þess frá hvaða svæðum einstaklingar koma og hver þeirra saga er. Það að koma frá einu ríki leiðir aldrei til einnar ákveðinnar niðurstöðu.“

Textinn sem fylgdi undirskriftalista mótmælenda

„Fyrr í þessum mánuði synjuðu íslensk stjórnvöld sjö flóttamönnum frá svæðum sem kallast bæði Írak og Kúrdistan um alþjóðlega vernd. Flestir þeirra eiga að baki hættulega ferð yfir ótal landamæri þar sem treysta þarf á smyglara. Margir neyddust til þess að skilja fjölskyldur sínar eftir í mjög erfiðum og lífshættulegum aðstæðum í von um að fá hjálp við fjölskyldusameiningu eftir að fá vernd. Með því að neita mönnunum um vernd er börnum þeirra líka neitað um möguleika á lífi án stríðsátaka.

Þessar synjanir þýða að íslensk stjórnvöld senda mennina alla leið til Írak um leið og þau fullyrða að þeir séu ekki flóttamenn, jafnvel þó að írakska Kúrdistan sé ekki á lista yfir örugg ríki. Þessar synjanir marka því nýja stefnumótun er varðar mál frá Írak og Kúrdistan af hálfu Útlendingastofnunar og íslenska ríkisins, þar sem virðist hafa verið ákveðið að Írak sé öruggt land án frekari vísbendinga eða útskýringa. Ástæðurnar sem flóttamönnunum hafa verið gefnar eru að þeir geti leitað sér skjóls í öðrum borgum innan Írak, jafnvel þó að það sé ekki möguleiki í þeirra tilviki. Írak er langt frá því að vera öruggt ríki fyrir þá að snúa aftur til. Þvert á móti stunda þeir tveir flokkar sem fara með völd í írakska Kúrdistan, KDP og PUK, mannrán og morð á almennum borgurum. Hver sá sem starfar fyrir stjórnvöld þar í landi þarf að fá meðmæli frá öðrum hvorum flokknum og er bæði lögregluyfirvöldum og fjármálamarkaðinum stýrt af öflum flokkana tveggja.

Við krefjumst þess að ÚTL og íslensk stjórnvöld stöðvi fyrirhugaðar aðgerðir um að brottvísa flóttamönnum til Írak og Kúrdistan!

Við krefjumst þess að helstu áhrifavaldar að baki þessum málum hætti að fela sig á bakvið stofnanir og taki ábyrgð: Sigríður Á. Andersen, dómsmálaráðherra, Kristín Völundardóttir, forstjóri Útlendingastofnunar, Hjörtur Bragi Sverrisson, formaður Kærunefndar og Katrín Jakobsdóttir, forsætisráðherra, hættið við brottvísanir flóttafólks til Írak og Kúrdistan!“