Ásmundur Friðriksson, þingmaður Sjálfstæðisflokksins, gagnrýndi kjarabaráttu ljósmæðra á Facebook síðu sinni. „Ljótleiki kjarabaráttunnar á sér engin takmörk,“ skrifar Ásmundur og birtir mynd af forsíðu Fréttablaðsins í dag.

Á forsíðunni er mynd frá undirbúningi samstöðufundar með ljósmæðrum þar sem ólétt kona býr til mótmælaskilti. Á skiltinu stendur „Helvítis fokking fæðingar.“

Óljóst er hvort Ásmundur er þarna að gagnrýna orðnotkun konunnar eða kjarabaráttu ljósmæðra í heild. Þegar blaðamaður hringdi í Ásmund sagðist hann vera á fundi og ekki hafa tíma til að tala.

Mynd: Facebook

Viðbrögð lesenda á Facebook síðu Ásmundar eru mest megnis neikvæð. „Ég hélt fyrst að XD væri að taka upp hanskann fyrir ljósmæður en auðvitað var það ekki svo gott,“ skrifar Arnar Eggert Thoroddsen tónlistargagnrýnandi. „Hvað er "ljótt" hér? Þessi sjálfsögðu, eðlilegu og mjög svo skiljanlegu skilaboð frá vammlausu fólki sem er einfaldega með manneskjulegar launakröfur? Eða er það kannski framkoma ríkisstjórnarinnar, fyrirlitningin þar og hin ómanneskjulega forgangsröðun fjármuna? Það bara hlýtur að vera sá ljótleiki sem þú vísar í. Annan sé ég ekki hér.“

Meðal þeirra sem „læka“ færslu Ásmundar er Karl Sigurbjörnsson, fyrrverandi biskup Íslands.