Sjóðsstýringarfyrirtækið GAMMA hefur samningsbundinn rétt á að 4 til 7 hljóðfæraleikarar frá ríkisstofnuninni Sinfóníuhljómsveit Íslands spili ókeypis á vegum fyrirtækisins allt að fjórum sinnum á ári. Þetta er meðal þess sem fram kemur í samstarfssamningi á milli GAMMA og Sinfóníuhljómsveitar Íslands sem undirritaður var árið 2016 og gildir í fjögur ár.  Samkvæmt samningnum greiðir GAMMA 18 milljónir króna á ári til Sinfóníuhljómsveitar Íslands gegn því að fá að nota nafn ríkisstofnunarinnar til að markaðssetja sig og auglýsa sem „aðalstyrktaraðila“ stofnunarinnar. Á heimasíðu GAMMA er mikið gert úr þessu samstarfi enda er Sinfóníuhljómsveit Íslands stofnun sem nýtur aðdáunar og virðingar í íslensku samfélagi og getur verið gott fyrir fyrirtæki að tengja nafn sitt við slíkt afl.  Hljómsveitin er að mestu fjármögnuð af íslenska ríkinu með 1039 milljóna króna fjárframlagi árið 2018 en aðrar tekjur voru áætlaðar 442 milljónir króna. 18 milljónirnar frá GAMMA eru því einungis 1,2 prósent af rekstrarfé ríkisstofnunarinnar. …