Svanhildur Konráðsdóttir, forstjóri Hörpu, segist í dag hafa farið fram á að laun sín yrðu lækkuð afturvirkt til að skapa frið um starfsemi Hörpu. „Ég óskaði eftir því við formann stjórnar Hörpu í dag að laun mín yrðu lækkuð afturvirkt frá 1. janúar 2018 og yrðu til samræmis við úrskurð kjararáðs frá því snemma árs 2017,“ skrifar Svanhildur á Facebook síðu sína. „Kjaramál mín hafa truflað mjög mikilvægt verkefni sem nú er í vinnslu er varðar rekstur hússins. Friður um Hörpu er ofar öllu.“

Tuttugu þjónustufulltrúar Hörpu hafa ákveðið að segja upp störfum í kjölfar fundar með Svanhildi í gær. Segja þjónustufulltrúar að Svanhildur hafi staðfest á fundinum að þeir hafi verið einu starfsmennirnir sem var gert að taka á sig beina launalækkun, en þeir hafi verið launalægstu starfsmenn hússins.

Rekstur Hörpu verið þungur

Uppsagnirnar koma í kjölfar ólgu vegna frétta af launahækkun Svanhildar, en stjórn Hörpu samdi við hana um laun sem eru 20% hærri en kjararáð kvað á um að laun forstjóra Hörpu skyldu vera. Í fyrri yfirlýsingu sagði Svanhildur að fullt samráð hafi verið haft við stéttarfélag og trúnaðarmann starfsmanna í þessum ferli. „Þjónustufulltrúum bauðst nýr samningur sem tók gildi um sl. áramót sem felur í sér 15% yfirborgun frá kjarasamningi og var þetta ein af fjölmörgum aðgerðum við að draga úr kostnaði við viðburðahald,“ sagði Svanhildur. „Störf þjónustufulltrúa eru unnin í tímavinnu og tengjast nánast einvörðungu viðburðahaldi í húsinu. Langflestir sinna þessu sem hlutastarfi með námi og einkennist ráðningarsambandið af miklum sveigjanleika hvað varðar tíma og vinnu sem innt er af hendi.“

Í yfirlýsingunni sagði Svanhildur að aldrei hafi verið haldið fram að sömu aðgerðum til launalækkunar starfsmanna yrði beitt á öllum sviðum. Aðgerðir til hagræðingar í rekstri Hörpu séu farnar að skila árangri, en rekstur batnaði á milli ára. „Rekstur Hörpu hefur verið þungur um árabil og á síðasta ári gerðu eigendur og stjórn skýra kröfu um að ráðist yrði í aðgerðir til að bæta reksturinn og draga úr tapi,“ segir Svanhildur.

Segir launahækkun hafa verið launalækkun

Stjórnarformaður Hörpu segir launahækkun forstjóra Hörpu í raun hafa verið launalækkun. Stjórnin hafi samið um 1,5 milljón króna mánaðarlaun við nýjan forstjóra, Svanhildi Konráðsdóttur, í byrjun árs 2017, en kjararáð hafi í kjölfar lækkað launin þar til lagabreyting færði ákvörðunarvald um launin undir stjórn Hörpu. Þá voru þau hækkuð aftur í 1,5 milljón króna og auk þess um 67.500 kr. samkvæmt kjarasamningi VR, alls 20% meira en kjararáð ákvarðaði.

Ný lög um kjararáð tóku gildi 1. júlí 2017 og hafði þá stjórn Hörpu þegar samið við Svanhildi. „Eftir að samið hafði verið um laun við nýjan forstjóra barst úrskurður kjararáðs um að laun forstjóra skyldu vera kr. 1.308.736 á mánuði,“ segir í tilkynningu frá Þórði Sverrissyni, stjórnarformanni Hörpu. „Því samþykkti forstjóri að umsamin mánaðarlaun skyldu lækka um kr. 191.264 fyrstu tvo mánuðina en samningurinn síðan gilda frá 1. júlí 2017.“

Segir Þórður Sverrisson, stjórnarformaður Hörpu, þau nú vera 14,6% hærri en kjararáð kvað á um. Ef kjarasamningsbundna hækkunin er tekin með eru launin 20% hærri en ákvörðun kjararáðs, en slík regluleg hækkun er  ekki í ákvörðuninni.

Hætta að nota Hörpu undir viðburði

Ellen Kristjánsdóttir söngkona lýsir því yfir á Facebook að hún muni ekki syngja framar í Hörpu fyrr en launalækkun þjónustufulltrúa verði leiðrétt. „Samstaðan skiptir öllu þegar svona gerist og þetta er að gerast út um allt,“ skrifar Ellen. „Þjónustufulltrúar sem sögðuð upp störfum í Hörpu, ég stend með ykkur.“ Í kjölfarið veltir hún fyrir sér hvort starf forstjóra sé rétt skipulagt. „Ef starf forstjóra Hörpu er svona erfitt, afhverju eru þá ekki bara tveir látnir skipta því á milli sín og laununum líka? Þannig gætu tvær manneskjur fengið mannsæmandi laun og átt frítíma með fjölskyldunni.“

„VR sem stéttarfélag getur ekki annað en tekið sér stöðu með starfsmönnum sem hafa verið smánaðir“

VR hefur lýst því yfir að félagið sé hætt að nota Hörpu undir viðburði og segja yfirlýsingu Svanhildar koma eins og blauta tusku í andlit félagsmanna. „Einu viðbrögðin eru þau að kveðja þessa dugmiklu starfsmenn og óska þeim velfarnaðar!“ segir í yfirlýsingu VR. „VR sem stéttarfélag getur ekki annað en tekið sér stöðu með starfsmönnum sem hafa verið smánaðir með þessum ótrúlega hætti og hætt öllum viðskiptum við Hörpu tónlistarhús þar til þetta mál fær eðlilega afgreiðslu.“ 

Laun stjórnenda hækkuðu um 16,8% á fjórum árum

Fram kom í tilkynningu Þórðar að laun stjórnar og forstjóra félagsins hefðu verið 29,3 milljónir króna á árinu 2017, en hafi staðið í 25 milljónum króna árið 2014. Þau hafi því hækkað um 16,8% á fjórum árum. Til samanburðar hefur verðlag hækkað um 8,7 prósent frá janúar 2014 til apríl 2018. „Í samningi við forstjóra eru engin ákvæði um bónusa, auk þess sem innifalin er öll vinna utan venjulegs vinnutíma og seta í stjórnum dótturfélaga,“ segir í tilkynningunni.

Þórður segir stjórn Hörpu hafa samþykkt þennan samning samhljóða og telur að launin hafi verið í samræmi við sambærileg störf. „Laun forstjóra voru ekki hækkuð um 20% eftir 2 mánuði í starfi heldur tók hún á sig tímabundna launalækkun vegna úrskurðar kjararáðs,“ segir í tilkynningu Þórðar.

Aðspurður segist hann ekki þekkja hver munurinn er á launum Svanhildar og fyrri forstjóra, en hann kom inn í stjórn Hörpu í september 2017, eftir samningana við Svanhildi.