Deilur um uppstillingu á lista Sjálfstæðisflokksins í Vestmannaeyjum komust í hámæli snemma árs en þá var felld tillaga um að halda skyldi prófkjör innan flokksins. Slík leið hefur ekki verið farin í 28 ár, þrátt fyrir að prófkjörsleiðin sé meginregla í samþykktum Sjálfstæðisflokksins þegar kemur að uppstillingu á framboðslista hans. Óánægja sumra Sjálfstæðismanna með niðurstöðuna var slík að í síðustu viku var boðað til stofnfundar bæjarmálafélags í Vestmannaeyjum og varð niðurstaðan sú að það félag myndi bjóða fram í komandi sveitarstjórnarkosningum. Þau tíðindi urðu síðan að Íris Róbertsdóttir, fyrrverandi varaþingkona flokksins, steig fram í byrjun þessarar viku og lýsti því yfir að hún gæfi kost á sér til að leiða listann.
Mikið vígi flokksins
Vestmannaeyjar hafa verið gríðarlegt vígi fyrir Sjálfstæðisflokkinn áratugum saman. Frá árinu 1990 hefur flokkurinn hlotið hreinan meirihluta í öllum bæjarastjórnarkosningum þar, utan árið 2002 þegar flokkurinn fékk þrjá bæjarfulltrúa kjörna af sjö. Í síðustu kosningum, 2014, vann flokkurinn síðan fáheyrðan sigur og hlaut 73 prósent greiddra atkvæða. Því eru það nokkur tíðindi nú að óánægja innan flokksins hafi brotist með þessum hætti upp á yfirborðið og valdi því að Sjálfstæðisfólk bjóði nú fram gegn félögum sínum.
Stundin heyrði í Írisi og grennslaðist fyrir um það hví hún hefði ákveðið að gefa kost á sér til að leiða hinn nýja lista. Íris segir að það hafi átt sér nokkurn aðdraganda. „Það hafa verið svona ýmsar væringar í kringum framboðsmálin og það var ekki sérstök sátt um hvernig ætti að velja á lista Sjálfstæðisflokksins. Ég fór á fund bæjarmálafélagsins sem stofnað var hér í síðustu viku, daginn eftir að listi Sjálfstæðisflokksins var kynntur, og mér leist afar vel á það. Félagið á að standa fyrir flott grunngildi og lýðræðisleg vinnubrögð sem mér líst mjög vel á. Þann dag fékk ég áskorun frá 195 Vestmannaeyingum um að gefa kost á mér til að leiða nýjan lista og ég tók bara ákvörðun um að gefa kost á mér.“
Þáði ekki þriðja sæti á lista Sjálfstæðisflokksins
Íris vill ekki samþykkja að bæjarmálafélagið sá aðeins óánægjuframboð ósátts Sjálfstæðisfólks, það sé opið öllum íbúum Vestmannaeyja og allir séu velkomnir. Félagið sé í eðli sínu þverpólitískt. „En það eru vissulega undirliggjandi ástæður fyrir því að fólk vilji finna sér annan vettvang. Allir sem þarna koma að vilja bæta samfélagið og láta gott af sér leiða. Mér finnst að það þurfi að ástunda lýðræðisleg vinnubrögð til að bæta samfélagið.“
Hefði verið samþykkt að halda prófkjör hjá Sjálfstæðisflokknum í Eyjum, þá hefði Íris gefið kost á sér þar, segir hún. Það gaf hún út strax í janúar. Spurð hvort rætt hafi verið við hana um að taka sæti á lista flokksins, eftir að tillaga um prófkjör var felld, játar hún því. „Það var rætt við mig í byrjun mars og mér boðið þriðja sæti en það voru ástæður fyrir því að ég vildi ekki þiggja það. Það var ekki haft samband aftur.“
Ekki tími fyrir prófkjör
Íris segist ekki hafa áhuga á að fara að greina ástæður deilna innan Sjálfstæðisflokksins í Vestmannaeyjum. „Sjálfstæðisflokkurinn hefur haft afskaplega sterka stöðu lengi í Vestmannaeyjum. Það sem hefur hins vegar ekki verið gert í 28 ár er að halda prófkjör. Hér er ofboðslega margt fólk skráð í flokkinn sem myndi vilja hafa áhrif á hvernig lista flokksins er stillt upp en það varð ekki. Þetta þyrfti að vera opnara og lýðræðislegra.“
Þegar bent er á að ekki standi til að halda prófkjör innan bæjarmálafélagisins og Íris spurð hvort það sé ekki í mótsögn við hennar málflutning svarar hún því játandi. „Bæjarmálafélagið er stofnað mjög seint í aðdraganda kosninga og helsta gagnrýnin sem ég heyri er á þetta, að stjórn bæjaramálafélagsins sá sér ekki fært að halda prófkjör, þvert á það sem ég hefði viljað. Bæði er félagið ekki stjórnmálaflokkur og svo er tíminn bara orðinn of naumur. Það hefði þurft mun lengri tíma, utankjörfundaatkvæðagreiðsla er til að mynda búin að vera í gangi í meira en viku. Ég fer samt ekki ofan af því að það að halda prófkjör, að leyfa fólki að koma að málum, er alltaf besta leiðin. Ég hef alltaf talað fyrir því, það er meginregla Sjálfstæðisflokksins, en hún hefur því miður ekki verið virkjuð í Vestmannaeyjum mjög lengi.“
Segir sig frá trúnaðarstörfum
Íris segist þrátt fyrir þetta ekki ætla að segja sig úr Sjálfstæðisflokknum en hún muni vissulega segja sig frá trúnaðarstörfum. „Allar ákvarðanir sem við tökum hafa áhrif á líf okkar. Ef ég tek sæti á lista bæjarmálafélgsins mun ég segja mig frá þeim trúnaðarstörfum sem ég gegni fyrir Sjálfstæðisflokkinn. Ég ætla hins vegar ekki að segja mig úr Sjálfstæðisflokknum, en það eru að vísu skipulagsreglur innan flokksins sem segja að vísa eigi þeim úr flokknum sem taki sæti á lista annarra framboða.“
Spurð hvort að Sjálfstæðisflokkurinn hafi þá ekki staðið sig vel við stjórnun bæjarfélagsins, og eins hvort það verði einhver munur á stefnumálum framboðanna tveggja, svarar Íris því játandi í báðum tilvikum. „Sjálfstæðisflokkurinn hefur að mörgu leyti staðið sig mjög vel, eins og bæjarastjórn Vestmannaeyja öll. En eins og alltaf er þá eru ákveðnir hlutir sem hægt er að gera betur. Ég ætla að fá að fara út í þá sálma seinna, ég er ekki komin með umboð til þess því ég er ekki enn orðin frambjóðandi bæjarmálafélagsins. Ég hef því ekki pólitískt umboð til að svara neinu um þetta ennþá en með nýju fólki koma nýjar áherslur, það er alltaf þannig.“
Athugasemdir