Viðskiptavinir Íslandsbanka sem eiga rétt á endurgreiðslu vegna ofreiknaðra vaxta á húsnæðislán fá ekki afgreiðslu sinna mála nema því aðeins að þeir noti til þess rafræn skilríki. Afgreiðsluleið fyrir þá sem ekki vilja notast við rafræn skilríki er ekki tilbúin en að sögn upplýsingafulltrúa Íslandsbanka mun þó ekki líða á löngu þar til hægt verður að afgreiða þeirra mál einnig. Viðskiptavinur Íslandsbanka sem á rétt á endurgreiðslu segir að vinnubrögð bankans séu „idjótísk.“
Brutu lög um neytendalán
Hæstiréttur staðfesti í október á síðasta ári úrskurð áfrýjunarnefndar neytendamála frá árinu 2015 þar sem kveðið var á um að Íslandsbanki hafi brotið gegn lögum um neytendalán með því að tilgreina ekki í tilteknum lánssamningi við hvaða aðstæður vextir breyttust. Lántakandi hjá Íslandsbanka kvartaði árið 2013 til Neytendastofu vegna hækkunar á vöxtum á húsnæðisláni sem hann tók árið 2005. Var lántakanum tilkynnt að vextir yrðu hækkaðir úr 4,15% í 4,8%. Komst Neytendastofa að því 20. október 2014 að bankinn hefði með þessu brotið gegn lögum um neytendalán. Áfrýjunarnefnd neytendamála komst að sömu niðustöðu en Héraðsdómur Reykjavíkur felldi úrskurðinn úr gildi með dómi 8. apríl 2016. Hæstiréttur sneri þeim dómi við í október á síðasta ári, sem fyrr segir.
Málið sem um ræðir var prófmál og þegar dómur féll var ljóst að fjöldi viðskiptavina bankans hefði verið rukkaður um ólögmæta vexti af húsnæðislánum sínum og ætti rétt á endurgreiðslu. Samkvæmt upplýsingum frá Íslandsbanka er fjöldi lánanna sem um ræðir um 600. Endurgreiðslur eru taldar nema um 800 milljónum króna.
Vill ekki láta þvinga sig
Bankinn hófst handa við að reikna út þær upphæðir sem um ræðir og var viðskiptavinum send tilkynning þess efnis inn á netbanka sinn. Meðal þeirra er Birna Gunnarsdóttir en hún fékk í morgun tölvupóst þess efnis að lokið væri við að þá útreikninga og hún gæti farið inn á ákveðna vefslóð, séð hversu háa upphæð hún ætti inni vegna ofgreiddra vaxta og ráðstafað upphæðinni. Þegar smellt er á slóðina er hins vegar krafist rafrænna skilríkja til að halda áfram. Slík skilríki á Birna ekki og hefur ekki hugsað sér að afla þeirra, í það minnsta ekki að sinni. Hún hafði því samband við Íslandsbanka og spurði hvort hún gæti fengið upplýsingar í heimabanka eða komið í bankann með löggild skilríki, vegabréf til að mynda, og fengið upplýsingar um hver upphæðin væri og tekið ákvörðun um hvað við hana yrði gert.
„Ég talaði við þjónustufulltrúa og hún sagði bara nei, ég yrði að vera með rafræn skilríki. Ég get ekki einu sinni notað Íslykil, sem margir nota í svona samskiptum, og ekki nálgast upplýsingarnar í heimabankanum sem mér þætti eðlilegasta leiðin. Það eru eflaust fleiri en ég sem eru ekkert að nota rafræn skilríki. Peningarnir fóru inn á lánið gegnum heimabanka og bankinn á að geta komið þeim sömu leið til baka án þess að viðskiptavinir séu þvingaðir til að fá sér rafræn skilríki. Mér finnst þetta idjótísk framkoma,“ segir Birna í samtali við Stundina.
Afgreiðsluleið ekki tilbúin
Samkvæmt svari frá Íslandsbanka við fyrirspurn Stundarinnar var sett upp sjálfsafgreiðsluviðmót á vef bankans til að að tryggja „skjóta endurgreiðslu til þeirra sem griett hafa hærri vexti en þeir hefðu átt að gera.“ Þar segir enn fremur: „Þessari lausn hefur verið mjög vel tekið og margir viðskiptavinir hafa þegið tilboð um að fá rafræn skilríki í leiðinni, enda notagildi rafrænna skilríka í hvers konar stafrænum erindagjörðum sífellt að vaxa. Viðskiptavinir sem ekki þiggja tilboð um að nota stafræna sjálfsafgreiðsluleið munu auðvitað fá sína endurgreiðslu einnig, en afgreiðsluleið fyrir þá er því miður ekki tilbúin. Það mun þó ekki líða á löngu þar til hægt verður að afgreiða þeirra mál einnig.“
Athugasemdir