„Ég trúi því að hann sé val­inn af Guði,“ sagði Guð­mundur Örn Ragn­ars­son, sjón­varps­maður Omega, í við­tali sínu við Eyþór Arnalds, borg­ar­stjóra­efni Sjálf­stæð­is­flokks­ins í Reykja­vík fyrir borg­ar­stjórn­ar­kosn­ing­arnar í maí.

Eyþór Arnalds kom í við­tal á kristi­legu sjón­varps­stöð­inni Ómega í gær og var við­talið tekið af Guðmundi Erni Ragn­ars­syni, sem meðal ann­ars hefur vakið athygli með frí­blaði sem hann rit­stýrði, þar sem hann lýsti ánægju með rúss­nesk lög sem „fara gegn femín­isma, gegn kyn­villu, gegn fóst­ur­eyð­ingum“. Í við­tal­inu var­aði Guð­mundur Örn, sem er fyrr­ver­andi þjóð­kirkju­prestur, við áhrifum djöf­uls­ins.

Guð­mundur Örn hvatti í við­tal­inu fólk til að gefa sér Jesús á vald, og bað fólk, í Jesú nafni, að kjósa Sjálf­stæð­is­flokk­inn.

Hann beindi orðum sínum til áhorf­enda undir lok við­tals­ins. 

„Og bara í Jesú nafni skora
ég á þig að kjósa Eyþór“

„Guð leiði þig og enn vil ég hvetja þig til að kjósa Sjálf­stæð­is­flokk­inn, það er að segja kjósa Eyþór. Mér finnst þetta snú­ast um hann. Hann er leið­togi þessa hóps. Og bara í Jesú nafni skora ég á þig að kjósa Eyþór. Ég trúi því að hann sé val­inn af Guði.“ 

Eyþór segist hafa leitað til Guðs

Í við­tal­inu sagði Eyþór að trú­fé­lög veittu dýpri þjón­ustu en sál­fræð­ingar. „Það er ákveðin sál­gæsla hjá trú­fé­lögum. Við sjáum það að fólk fær oft aðra þjón­ustu hjá trú­fé­lögum heldur en hjá sál­fræð­ingum. Oft dýpri. Þannig að þetta er önnur upp­lifun. Sál­fræð­ingar geta leyst ein­hver mál. En ef við tækjum burt trú­fé­lögin úr tepp­inu, eins og ég segi, þá held ég að það myndi rakna upp.“

„Minn vilji fékk ekki að ráða.“

Þá talar Eyþór um að hann hafi leitað til Guðs og að Guðs vilji hafi ráðið för í fram­boði hans. „Ég von­aði að ein­hver annar myndi gefa kost á sér, sem ég myndi treysta fyrir því. Ég vissi að þetta væri mikið verk.  Þannig að ég bað Guð að gefa mér styrk að segja nei, því margir voru að biðja mig um að fara í þetta. En á end­anum, þá fór það öðru­vísi, og sagt er nú að vegir Guðs séu órann­sak­an­legir, og hann, í raun­inni kannski, vildi að þetta færi á hinn veg­inn. Minn vilji fékk ekki að ráða. Og nú er ég hér.“

Guð­mundur Örn var áður prestur í Þjóð­kirkj­unni, en þótti of bók­stafstrú­aður. Eftir að hann sagði íbúum á Sel­tjarn­ar­nesi til synd­anna í upp­hafi tíunda ára­tug­ar­ins, vegna þess að djöf­ull­inn léki þar lausum hala, og að guð­leys­ingjar ættu vísa vist í hel­víti, var hann á eigin vegum. Hann er nú for­stöðu­maður trú­fé­lags­ins Samfélag trú­aðra, sem 28 manns eru skráðir í.