Mikill fjöldi áhrifafólks í íslensku samfélagi fyrr og nú heiðraði Davíð Oddsson, ritstjóra Morgunblaðsins og fyrrverandi forsætisráðherra og seðlabankastjóra, í sjötugsafmæli hans í húsnæði Morgunblaðsins á Hádegismóum í gær.
Meðal gesta Davíðs voru Þórólfur Gíslason, kaupfélagsstjóri Kaupfélags Skagafjarðar, Eyþór Arnalds, frambjóðandi í oddvitasæti Sjálfstæðisflokksins í Reykjavíkurborg, Bjarni Benediktsson fjármálaráðherra, Þórdís Kolbrún Reykfjörð Gylfadóttir, ferðamála-, iðnaðar- og nýsköpunarráðherra, Sigríður Andersen dómsmálaráðherra, Halldór Benjamín Þorbergsson, framkvæmdastjóri Samtaka atvinnulífsins, Ingvi Hrafn Jónsson, fyrrverandi sjónvarpsstjóri ÍNN, Áslaug Arna Sigurbjörnsdóttir, varaformaður Sjálfstæðisflokksins, Logi Bergmann Eiðsson fjölmiðlamaður, Svanhildur Hólm Valsdóttir, aðstoðarkona Bjarna Benediktssonar, Gunnlaugur Sigmundsson, faðir Sigmundar Davíðs Gunnlaugssonar, formanns Miðflokksins, auk fjölda fjölmiðlafólks sem starfar fyrir Árvakur. Þá voru viðstaddir Vilhjálmur Þ. Vilhjálmsson, fyrrverandi borgarstjóri, og Ólafur F. Magnússon, einnig fyrrverandi borgarstjóri.
Í ræðu sinni gagnrýndi meðritstjóri Davíðs, Haraldur Johannessen, núverandi borgaryfirvöld fyrir að hugsa ekki um hag skattgreiðenda, eins og Davíð.
Fjallað er um afmæli Davíðs á mbl.is og myndir birtar af gestunum.
Fram kemur á Vísi.is að Davíð hefði í ræðu sinni sent öðrum íslenskum prentmiðlum með þeim orðum að ekkert blað væri hægt að lesa á Íslandi annað en Morgunblaðið. „Reyndar er ekkert annað blað í landinu, satt best að segja. Ekki sem hægt er að lesa. Það er til blað sem vitað er að einhverjir fletti en ég hef ekki enn hitt neinn sem les það,“ sagði hann.
Sama dag hafði Morgunblaðið birt langa lofgrein um Davíð og störf hans. Höfundur greinarinnar er Hannes Hólmsteinn Gissurarson, sem leggur nú lokahönd á skýrslu um erlenda áhrifaþætti íslenska efnahagshrunið, en niðurstaða hans í greininni stangaðist í meginatriðum á við niðurstöðu Rannsóknarskýrslu Alþingis vegna hruns bankanna.
Athugasemdir