Kristján Þór Júlíusson, nýskipaður landbúnaðar- og sjávarútvegsráðherra, hefur gegnt stöðu stjórnarformanns útgerðarrisans Samherja auk þess sem hann hefur unnið hjá fyrirtækinu samhliða þingmennsku sinni í þinghléum.

Samherji er stærsti hagsmunaðilinn í íslenskum sjávarútvegi, lang stærsta útgerðarfélag landsins og eitt stærsta útgerðarfyrirtæki í Evrópu. Akureyska útgerðin er stærsti kvótaeigandi á Íslandi þegar kvóti allra útgerða sem félagið á og á í er lagður saman.

Kristján Þór fer nú með ráðherravald í málaflokknum sem snýr að sjávarútveginum sem slíkum þar sem Samherji hefur svo mikilla hagsmuna að gæta. 

Varð formaður í kjölfar Guggumálsins

Kristján Þór, sem fæddur er á Dalvík, var kjörinn stjórnarformaður Samherja árið 1996 þegar hann gegndi starfi bæjarstjóra á Ísafirði. Þegar Kristján var bæjarstjóri á Ísafirði var togarinn Guðbjörg, eða Guggan, seldi til Samherja þegar útgerðin Hrönn rann inn í akureyrsku útgerðina í ársbyrjun 1997.

Við það tilefni sagði Þorstein Már Baldvinsson, forstjóri Samherja, eina frægustu setningu íslenskrar útgerðarsögu þegar hann kvað togarann áfram verða gerðan út frá Ísafirði í nánustu framtíð: „Guggan verður áfram gul og gerð út frá Ísafirði.“ Kristján Þór var stjórnarformaður Samherja til ársins 1998. 

Sama ár, 1998,  varð Kristján bæjarstjóri á Akureyri og árið 1999 var Guðbjörgin seld til Þýskalands og vakti salan mikla reiði á Ísafirði. Um þetta sagði Halldór Halldórsson, eftirmaður Kristjáns Þórs meðal annars: „Þeir gáfu þá yfirlýsingu á fundi með fulltrúa bæjarstjórnar á sínum tíma, og það kom í heimafjölmiðlum að engin breyting yrði. Guðbjörgin yrði áfram Guðbjörgin og gerð út frá Ísafirði, eða eins og þeir sögðu: "Guggan verður áfram gul og gerð út frá Ísafirði." Það gleymdist að taka það fram að hún myndi heita Hannover, gerð út frá Þýskalandi og yrði lengd um 18 metra."

Kristján Þór var bæjarstjóri á Akureyri þar til hann settist á þing árið 2007. 

Starfaði fyrir Samherja

Kristján Þór hélt hins vegar áfram að vinna fyrir Samherja sem sjómaður í þinghléum eftir að hann settist á Alþingi. Sumrin 2010 og 2012 fór Kristján Þór í túra á makrílveiðar á togara Samherja, Vilhelm Þorsteinssyni EA, og sagði af því tilefni í samtali við DV í júlí 2012: „Ég get alveg vottað með fullri vissu að samstarfsviljinn, samstarfið og samþættingin er til muna betri í þessari áhöfn en á þeim vinnustað sem ég hef verið á síðastliðin fjögur ár,“ sagði Kristján Þór.

„Ég get alveg vottað með fullri vissu að samstarfsviljinn, samstarfið og samþættingin er til muna betri í þessari áhöfn en á þeim vinnustað sem ég hef verið á síðastliðin fjögur ár“

Ekki liggur fyrir hvort Kristján Þór hefur farið aftur á sjóinn með Samherja frá árinu 2012 en hann staðfesti við DV að hafa einnig farið um sumarið 2010. 

Málefni Samherja, meðal annars kvótamálin, heyra nú undir Kristján Þór Júlíusson í sjávarútvegs- og landbúnaðarráðuneytinu.