Minnst 13 eru látnir eftir að sendibíl var ekið á mannfjöldann á Römblunni, aðalgötunni í Barcelona klukkan þrjú í dag. Atburðurinn ber merki hryðjuverks í ætt við þau sem framin voru í Nice og í Berlín í fyrra og svo á aðalverslunargötunni í Stokkhólmi í apríl.
Mikill ótti hefur gripið um sig meðal fólks á svæðinu. Bílstjórinn ók inn í mannfjöldann og hæfði tugi manna, en forðaði sér á fæti.
„Fólk er beðið að halda sig frá Römblunni, það er ekki búið að ná honum,“ segir Hadda Hreiðarsdóttir, Íslendingur sem er búsett skammt frá.
„Ég bý þremur mínútum frá og kom út hálftíma eftir þetta, og það var ótrúlega hljótt og enginn á ferli, en ég áttaði mig ekki á því að það hefði eitthvað gerst. Ég hoppaði upp á hjólið og hjólaði af stað og heyrði þá í sírenum og þyrlum. Þá fékk ég símtal frá sambýlismanni mínum sem sagði mér hvað hefði gerst.“
„Allir eru harmi slegnir og að tékka hver á öðrum. Þetta er ægilegt, ég var hálftíma áður að labba þar sem þetta gerðist.“
Maðurinn er í hvítum bol með bláum röndum og vopnaður, samkvæmt fréttum.
Ekki er ljóst með ásetning bílstjórans, en tilgangur hryðjuverkamanna er að framkalla ótta í huga þeirra sem heyra fréttir af atburðunum og er aðferðin að fremja árásir á stöðum sem margir geta tengt við, einna helst vinsælum ferðamannastöðum.
Kolbrún Bergþórsdóttir, ritstjóri og bókmenntafræðingur, er lokuð inni í verslun við Römbluna í Barcelona. Hún segir í samtali við Stundina að búðin hafi verið lokuð af og þar séu um 80 manns.
„Ég er lokuð inni í búð,“ segir Kolbrún. „Ég var hérna inni í búð og allt í einu kemur hópur af fólki hlaupandi inn, skelfingu lostið, æpandi og það fyrsta sem maður hugsar er hryðjuverkaárás. Búðinni var lokað, þetta er stór súpermarkaður, ég er búin að vera hérna í einn og hálfan tíma með um 80 manns. Þetta er mjög sérstök upplifun og hvernig fólk tekur á þessu. Við höfum aðeins fengið þær upplýsingar að maður hafi keyrt trukk inn í mannþröng.“
Kolbrún segir það upplifun að sjá mismunandi viðbrögð fólks. „Það er hérna maður í búðinni, Indverji með fjölskyldu sinni, sem ýtti barninu sínu frá og var mjög nærri árásarmanninum. Svo er mæðgur, kona og táningsdóttir sem voru mjög nálægt. En ég var bara hérna inni í búðinni. Við fengum drykk hérna, svalandi drykk en litlar upplýsingar. Búðinni var bara lokað, skellt í lás og hlerar settir niður. Við sáum að það var allt fullt af lögreglumönnum. Það er sérstakt að upplifa þetta með hópi af fólki sem bregst mjög misjafnalega við. Hér er maður sem les, fólk sest niður og er tiltölulega rólegt en svo var fólki í miklu áfalli og hágrét og grætur enn. Fólkir brosir hughreystandi til hvors annars og talar saman.“
Athugasemdir