Kim Jong-un hefur ítrekað stuðning Norður-Kóreu við innrás Rússlands í Úkraínu og heitið því að hjálpa Vladimir Pútín að ná sigri í því sem hann kallar „heilagt“ stríð.
Norður-Kórea hefur sent eldflaugar, skotfæri og þúsundir hermanna til að styðja Rússa í Úkraínu. Sérfræðingar segja að í staðinn veiti Rússar fjárhagsaðstoð, hernaðartækni, matvæli og orku til Norður-Kóreu, sem hefur verið einangruð á alþjóðavettvangi.
Síðustu daga hefur fjöldi háttsettra rússneskra embættismanna heimsótt Norður-Kóreu. Til að mynda átti varnarmálaráðherrann Andrey Belousov fund með Kim í gær, samkvæmt opinberum tilkynningum.
Ríkisfréttastofan KCNA greindi frá því að á fundinum hafi Kim heitið því að Norður-Kórea muni „áfram styðja að fullu stefnu Rússlands um að verja þjóðlegt fullveldi, landamæri og öryggishagsmuni.“
Kim sagðist einnig „trúa því að rússneski herinn og þjóðin muni vinna sigur í þessu réttláta og heilaga stríði“.
Fulltrúar beggja ríkja sögðu að rætt hefði verið um aukið hernaðarsamstarf, og Belousov sagði að Rússland væri reiðubúið að undirrita samstarfsáætlun sem næði frá 2027 til 2031.
Föllnum hermönnum lyft sem hetjum
Kim, Belousov og forseti neðri deildar rússneska þingsins, Vyacheslav Volodin, voru einnig viðstaddir opnun minnisvarða um norður-kóreska hermenn sem féllu í Úkraínu. Á opnunarhátíðinni voru meðal annars tónleikar, flugeldasýning og flugsýningu herflugvéla.
Í ávarpi sínu ræddi Kim um „óviðjafnanlegt hugrekki, sameiginlega hetjudáð, óbugandi baráttuanda og göfuga fórn“ hermannanna. Hann tók þátt í athöfn þar sem fallnir hermenn voru lagðir til hinstu hvílu, rifjaði upp „síðustu hetjulegu augnablik þeirra“ og mokaði mold yfir jarðneskar leifar eins þeirra.
Áhorfendur voru sagðir hafa orðið djúpt snortnir af lýsingum á „blóðugum bardögum upp á líf og dauða“ og „bardögum þar sem hermenn lögðu líf sitt í hættu og sprengdu sig í loft upp án þess að hika líkt og hetjur“.
Norður-Kórea og Rússland undirrituðu hernaðarsamning árið 2024 sem kveður á um að ríkin veiti hvort öðru tafarlausa hernaðaraðstoð verði annað þeirra fyrir árás.
Lýsti glæsilegum árangri í stríði
Opnun minnisvarðans fer fram nú þegar eitt ár er liðið frá því að Rússar náðu aftur yfirráðum yfir hluta Kursk-héraðs, þar sem Úkraína hóf umfangsmikla gagnsókn um mitt ár 2024. Norður-kóreskir hermenn voru sendir á svæðið til að hjálpa við að hrinda sókn Úkraínumanna. Á fundinum með Belousov hrósaði Kim „glæsilegum árangri í frelsun Kursk“, samkvæmt KCNA.
Stjórnvöld í Suður-Kóreu áætla að um 2.000 Norður-Kóreumenn hafi fallið í stríðinu í Úkraínu. Í bréfi til Kim, sem birt var af KCNA, hrósaði Pútín „óvenjulegu hugrekki og einlægri hollustu“ norður-kóreskra hermanna. Þeim er sagt hafa verið skipað að svipta sig lífi frekar en að lenda í haldi óvinarins. Aðeins tveir norður-kóreskir hermenn hafa verið teknir lifandi og eru í haldi úkraínskra yfirvalda.
Friðarboði hafnað
Norður-Kórea hefur lýst Suður-Kóreu sem „helsta óvini sínum“, þrátt fyrir tilraunir Seúl-stjórnarinnar til betri samskipta.
Forseti Suður-Kóreu, Lee Jae Myung, sagði í dag að „örlög beggja ríkja séu að láta friðarblómin blómstra“. Hann hét því að vinna „markvisst“ að því að endurbyggja traust samband við Norður-Kóreu og bætti við: „Við vonum að norðrið treysti einlægni ríkisstjórnar okkar og bregðist við með sama hætti.“
Ummæli Lee féllu á afmæli leiðtogafundar ríkjanna árið 2018, þegar Kim og þáverandi forseti Suður-Kóreu, Moon Jae-in, tóku táknrænt skref yfir landamæri hvors annars.
Sá fundur skilaði yfirlýsingu um að stefna að formlegum endalokum Kóreustríðsins, en viðræðum var hætt þegar spenna milli ríkjanna jókst á ný.
Úkraínustríðið
Pútín kvaðst vera til í friðarviðræður
Reyna að koma á fundi um skiptingu heimsins og örlög Úkraínu
Berast ásakanir frá Bandaríkjunum en segjast ekki fá viðvaranir
Leiðtogar Evrópu fylkja sér að baki Zelensky í átökum við Trump
Segja að Bandaríkin hjálpi núna Rússlandi
Athugasemdir