Stjórn Rósarinnar, félags innan Samfylkingarinnar, hefur lokið viðræðum við stjórnmálaaflið Vinstrið um mögulegt samstarf vegna komandi sveitarstjórnarkosninga. Niðurstaðan er að Rósin mun fylkja sér áfram að baki Samfylkingunni, fremur en að ganga til liðs við Vinstrið.

Aðdragandi viðræðnanna var ósætti meðlima Rósarinnar, og formanns hennar, Guðmundar Inga Þóroddssonar, með að hann hlyti ekki sæti ofarlega á lista Samfylkingarinnar fyrir borgarstjórnarkosningar í maí. Rósin sagði sig úr fulltrúaráði Samfylkingarinnar í kjölfarið. Þá sagðist Guðmundur Ingi vera „með plan“ og hóf síðan viðræður við Vinstrið, áður nefnt Vor til vinstri, sem er sameinað framboð Sönnu Magdalenu Mörtudóttur, sem kjörin var fyrir Sósíalista, og Vinstri grænna.

Í yfirlýsingu Rósarinnar í dag, sem er undirrituð af varaformanni hennar, Guðnýju Maju Riba, er niðurstaðan gerð ljós. 

„Að undangengnu mati hefur stjórn Rósarinnar ákveðið einróma að halda áfram starfi sínu innan Samfylkingarinnar og styðja hana í komandi kosningum. Skýr vilji stjórnar er að vinna að festu, samstöðu og ábyrgri málefnalegri vinnu.“

Þá er vísað óbeint til umræðu um fordóma gagnvart formanni Rósarinnar, sem er formaður Afstöðu, félags fanga.

„Ferlið hefur verið lærdómsríkt og undirstrikað mikilvægi opinnar umræðu um fordóma og stöðu jaðarsettra hópa í samfélaginu. Rósin hefur um árabil lagt sitt af mörkum til þeirrar umræðu og mun halda þeirri vinnu áfram af ábyrgð og festu,“ segir í yfirlýsingunni.

Rósin óskar síðan Samfylkingunni „til hamingju með öflugan og fjölbreyttan framboðslista“.

Athygli vakti í myndatöku fyrir framboðslista Samfylkingarinnar í Reykjavík í dag að Heiða Björg Hilmisdóttir borgarstjóri, sem hafnaði í öðru sæti í prófkjöri flokksins, var ekki viðstödd. Hún var sögð veik.