Embættismenn frá Úkraínu, Bandaríkjunum og Rússlandi munu halda öryggisviðræður í Sameinuðu arabísku furstadæmunum í dag, að sögn rússneskra stjórnvalda, í kjölfar fundar helstu samningamanna Bandaríkjanna með Vladimír Pútín, forseta Rússlands, í Moskvu um áætlun sem Bandaríkin hafa lagt fram til að binda enda á stríðið í Úkraínu.

Diplómatískar tilraunir til að binda enda á mannskæðustu átök Evrópu frá síðari heimsstyrjöld hafa aukist á undanförnum mánuðum, þótt stjórnvöld í Moskva og Kænugarði séu enn ósammála um lykilatriðið varðandi landsvæði í sátt eftir stríð.

Bandarískir samningamenn, undir forystu sendifulltrúans Steve Witkoff, ræddu við rússneska leiðtogann í Moskvu fram á morgun, samkvæmt yfirlýsingu frá stjórnvöldum í Rússlandi.

Júrí Úshakov, diplómatískur ráðgjafi Rússlands, sagði við fréttamenn að viðræður þeirra hefðu verið „gagnlegar í alla staði“.

Witkoff og bandaríska teymið fljúga næst til Abu Dhabi, þar sem búist er við að viðræður haldi áfram.

Rússnesk sendinefnd, undir forystu Ígors Kostjúkovs hershöfðingja, yfirmaður rússnesku herleyniþjónustunnar GRU, mun einnig halda þangað „á næstu klukkustundum“, að sögn Úshakovs.

„Það var samþykkt að fyrsti fundur þríhliða vinnuhóps um öryggismál fari fram í dag í Abu Dhabi,“ bætti Úshakov við.

„Við höfum einlægan áhuga á að leysa [átökin] með pólitískum og diplómatískum hætti,“ sagði hann, en bætti við: „Þar til það gerist mun Rússland halda áfram að ná markmiðum sínum ... á vígvellinum.“

Witkoff hafði áður sagt að hann teldi að báðar hliðar væru „komnir niður í eitt mál“, án þess að útskýra það nánar.

Myndband sem rússar birtu sýndi brosandi Pútín takast í hendur við Witkoff, Jared Kushner, tengdason Donalds Trumps Bandaríkjaforseta, og Josh Gruenbaum, ráðgjafa Hvíta hússins.

Þessi mikilvægi fundur átti sér stað aðeins nokkrum klukkustundum eftir að Volodimír Selenskí, forseti Úkraínu, sagði að drög að samkomulagi væru „næstum, næstum tilbúin“ og að hann og Trump hefðu náð samkomulagi um öryggisábyrgðir eftir stríð.

Hann sagði einnig að Bretland og Frakkland hefðu þegar skuldbundið sig til að senda hersveitir á vettvang.

Selenskí sagði að sendinefnd Úkraínu á fundinum í Sameinuðu arabísku furstadæmunum yrði undir forystu Rústems Úmerovs, ritara Þjóðaröryggis- og varnarráðsins, og að Andríj Gnatov hershöfðingi, starfsmannastjóri úkraínska hersins, einnig taka þátt í viðræðunum.

Rússland, sem hernemur um 20 prósent af Úkraínu, þrýstir á um full yfirráð yfir Donbas-héraði í austurhluta landsins sem hluta af samkomulagi.

En úkraínsk stjórnvöld hafs varað við því að það að láta af hendi landsvæði muni hvetja Rússa áfram og segjast ráðamenn ekki munu undirrita friðarsamning sem kemur ekki í veg fyrir að Rússland hefji nýja árás.

Evrópa „sundruð“

Ekki hefur verið greint frá öllum smáatriðum um komandi viðræður í Sameinuðu arabísku furstadæmunum og ekki er ljóst hvort rússneskir og úkraínskir embættismenn munu hittast augliti til auglitis.

Selenskí sagði að þessar viðræður myndu standa í tvo daga.

Trump endurtók á miðvikudag oft yfirlýsta trú sína á því að Pútín og Selenskí væru nálægt samkomulagi.

„Ég tel að þeir séu komnir á þann stað núna að þeir geti komið saman og gert samning. Og ef þeir gera það ekki, eru þeir heimskir – það á við um þá báða,“ sagði hann eftir að hafa flutt ræðu í Davos.

Selenskí gagnrýndi í ræðu sinni í Davos skort ESB á „pólitískum vilja“ til að bregðast við Pútín í eldheitri ræðu.

„Í stað þess að verða raunverulegt heimsveldi er Evrópa áfram falleg en sundruð sjónhverfing lítilla og meðalstórra ríkja,“ sagði hann.

Stórkostlegar stefnubreytingar Trumps í utanríkismálum, þar á meðal nýleg tilraun til að taka yfir Grænland  hafa vakið áhyggjur í Evrópu um hvort hægt sé að treysta Bandaríkjunum sem áreiðanlegum bandamanni.

Í ræðu sinni gagnrýndi Selenskí Evrópu fyrir að binda vonir við að Bandaríkin myndu verja þá ef til árásar kæmi.

„Evrópa virðist ráðvillt í tilraunum sínum til að sannfæra Bandaríkjaforseta um að skipta um skoðun,“ sagði Selenskí.

Rússneskar árásir í þessari viku hafa skilið stóran hluta Kænugarðs eftir án rafmagns, þar sem íbúar 4.000 bygginga eru án hita í frosti.

Rússland, sem hóf innrás sína í Úkraínu í febrúar 2022, segir að árásir sínar beinist að orkuinnviðum sem knýja „hernaðar- og iðnaðarsamstæðu“ Úkraínu.

Úkraínsk stjórnvöld segja árásirnar vera stríðsglæp sem ætlað er að slíta út almenna borgara.