Zohran Mamdani hét því í gær að sýna fram á að vinstri stjórnmál gætu borið árangur þegar hann tók við embætti borgarstjóra New York. Búist er við að á kjörtímabili hans muni honum lenda saman við Donald Trump, forseta Bandaríkjanna.
Þúsundir manna komu saman í ískulda í stærstu borg Bandaríkjanna til að fagna innsetningu þessa 34 ára gamla demókrata, en hann hefur átt glæsilegan frama í stjórnmálum eftir að hafa verið tiltölulega óþekktur fyrir aðeins ári síðan.
„Þeir vilja vita hvort vinstrið geti stjórnað. Þeir vilja vita hvort hægt sé að leysa úr þeim erfiðleikum sem hrjá þá,“ sagði Mamdani fyrir utan ráðhúsið.
„Við munum gera eitthvað sem New York-búar gera betur en nokkur annar: Við munum setja heiminum fordæmi.“
Í 24 mínútna ræðu sinni bætti hann við: „Frá og með deginum í dag munum við stjórna af víðsýni og áræðni.“
Mamdani, fyrsti múslimski borgarstjóri New York, lagði áherslu á framfærslukostnaðarmál sem voru miðlæg í borgarstjóraframboði hans og hét því að hjálpa þeim sem „hið rótgróna kerfi hefur svikið“.
Vinstrisinnaðir bandamenn hans, öldungadeildarþingmaðurinn Bernie Sanders og þingkonan Alexandria Ocasio-Cortez, fluttu einnig ræður fyrir framan um 4.000 boðsgesti.
„Þakka ykkur fyrir að gefa okkur, frá strönd til strandar, von og sýn um að við getum skapað stjórnvöld sem vinna fyrir alla, ekki bara fyrir hina ríku og fáu,“ sagði Sanders, fyrrverandi forsetaframbjóðandi.
Á einum tímapunkti í ræðu hans hóf mannfjöldinn að kalla „skattleggið þau ríku“. Mamdani vill hækka skatta á ríkustu íbúa New York.
Þúsundir manna flykktust einnig til miðborgar Manhattan, margir með gular og bláar húfur merktar „Zohran“, til að horfa á athöfnina á stórum skjám.
„Þetta er í fyrsta skipti á allri okkar ævi sem við finnum fyrir einhvers konar pólitískri von,“ sagði hinn 31 árs gamli vísindamaður Jacob Byerly við AFP ásamt eiginkonu sinni Auburn.
Metnaðarfull stefnuskrá
Mamdani, sem lýsir sér sem lýðræðislegum sósíalista, tekur við völdum á sama tíma og Trump hefur rekið harða hægristefnu.
En það á eftir að koma í ljós hvort Mamdani geti staðið við metnaðarfulla stefnuskrá sína, sem felur í sér frystingu leiguverðs, almenna barnagæslu og ókeypis almenningsvagna.
Hegðun Trumps gæti ráðið úrslitum.
Repúblikaninn, sem er sjálfur New York-búi, hefur ítrekað gagnrýnt Mamdani, en þeir áttu furðu vinsamlegar viðræður í Hvíta húsinu í nóvember.
Eitt deilumálið gæti orðið áhlaup innflytjendaeftirlitsins þar sem Trump stendur fyrir sífellt harðari aðgerðum gegn innflytjendum víðs vegar um Bandaríkin.
Mamdani hefur heitið því að vernda samfélög innflytjenda.
Fyrir kosningarnar í nóvember hótaði forsetinn einnig að skera niður alríkisframlög til New York ef borgin kysi Mamdani, sem hann kallaði „kommúnískan brjálæðing“.
Borgarstjórinn hefur sagt að hann telji Trump vera fasista.
Mamdani minntist aðeins einu sinni á Trump í ræðu sinni þegar hann ræddi fjölbreytileika borgarinnar og nefndi stuðningsmenn forsetans sem einnig studdu hann í borgarstjórakosningunum.
Táknræn innsetning
Innsetningarathöfnin var þrungin táknrænum atriðum.
Letitia James, ríkissaksóknari New York, sem sótti Trump til saka fyrir svik með góðum árangri, stjórnaði einkaathöfn á miðnætti þar sem embættiseidurinn var svarinn á yfirgefinni neðanjarðarlestarstöð.
Skrifstofa Mamdanis sagði að þessi látlausi vettvangur undir ráðhúsinu endurspeglaði skuldbindingu hans við verkafólk.
Og í fyrsta skipti í sögu borgarinnar notaði hann Kóraninn til að sverja embættiseið sem borgarstjóri.
Mamdani fæddist í Úganda og er af indverskum ættum, flutti til New York sjö ára gamall og naut forréttindauppeldis með aðeins tiltölulega stuttri þátttöku í stjórnmálum.
Til að vega upp á móti reynsluleysi sínu umkringir hann sig reyndum aðstoðarmönnum sem ráðnir eru úr fyrri borgarstjórnartíðum og úr stjórnartíð Joe Biden, fyrrverandi forseta Bandaríkjanna.
Mamdani hefur einnig hafið viðræður við leiðtoga í viðskiptalífinu, en sumir þeirra spáðu fjöldaflótta efnaðra New York-búa ef hann sigraði. Leiðtogar í fasteignageiranum hafa borið þær fullyrðingar til baka.
Sem verjandi réttinda Palestínumanna mun hann þurfa að sefa áhyggjur gyðingasamfélags borgarinnar – þess stærsta í Bandaríkjunum.
Lítill hópur fólks með ísraelska fána virtist mótmæla Mamdani með því að þeyta lúðra á meðan á ræðu hans stóð.
Athugasemdir