Benedikt Jóhannesson, stofnandi Viðreisnar og fyrrverandi fjármálaráðherra, rifjar upp stuðning Sigmundar Davíðs Gunnlaugssonar, formanns Miðflokksins, við að sækja um aðild að Evrópusambandinu árið 2009.

Sigmundur Davíð hefur gagnrýnt þá stefnu ríkisstjórnarinnar að halda þjóðaratkvæðagreiðslu um hvort aðildarviðræður við Evrópusambandið hefjist að nýju. „Þeir sem gagnrýndu undirlægjuhátt stjórnvalda gagnvart ESB voru sakaðir um heimóttarskap og að treysta ekki þjóðinni,“ skrifaði Sigmundur Davíð á Facebook í júlí um sjónvarpsviðtal við Þorgerði Katrínu Gunnarsdóttur utanríkisráðherra. „Ég fékk „flashback“ til 2009. Fyrsta hreina vinstristjórnin virtist mætt aftur. Þetta frá fólkinu sem treystir þjóðinni ekki fyrir horn og allra síst fyrir sannleikanum.“

Gagnrýndi hann stjórnmálamenn sem vilja „kíkja í pakkann“ og kanna hvað sé í boði með aðildarumsókn að Evrópusambandinu áður en samningurinn verði lagður í þjóðaratkvæðagreiðslu. „Nákvæmlega þetta var reynt þegar sótt var um á sínum tíma. Þá reyndu hins vegar fulltrúar ESB í forundran að útskýra fyrir íslenskum stjórnmálamönnum að það væri ekkert til sem héti samningaviðræður við ESB um hvað væri í boði. Ríki sæki um aðild með það að markmiði að fá inngöngu. Svo taki við viðræður þar sem umsóknarríkið leitast við að útskýra fyrir ESB hvernig það ætli að uppfylla kröfur ESB,“ skrifaði Sigmundur Davíð.

„Ríkisstjórnin veit að Íslendingar muni aldrei fallast á að ganga í ESB nema það takist að plata þá til þess með blekkingum, eitt skref í einu,“ bætti hann við að lokum.

Birtir bréf til kjósenda frá 2009

Benedikt, sem yfirgaf Sjálfstæðisflokkinn og stofnaði Viðreisn á sínum tíma vegna skoðanna sinn á ESB aðild, birti á Facebook-síðu sinni í gær upprifjun á orðum Sigmundar Davíðs fyrir kosningar vorið 2009 þegar hann var nýorðinn formaður Framsóknarflokksins. Birtust þau í bréfi til kjósenda undir yfirskriftinni „Evrópa fyrir okkur öll“ og hljóðuðu svo:

„Framsóknarflokkurinn er eini flokkurinn sem hefur markað sér skýra stefnu fyrir aðildarviðræður við Evrópusambandið og skilgreint samningsmarkið þeirra viðræðna. Framsókn hefur sett það sem skilyrði fyrir aðild að fullveldi og óskorað forræði yfir auðlindum þjóðarinnar verði grundvallarkrafa í þeim viðræðum, auk skilyrða sem lúta m.a. að hagsmunum landbúnaðar og sjávarútvegs. Fordæmi eru fyrir slíku í samningum annarra þjóða við Evrópusambandið og því algerlega rangt að halda því fram að þessar kröfur hamli því að af aðildarsamningi geti orðið.“

Benedikt bendir á að bréfið hafi verið sent til kjósenda vorið 2009. „Og hver skyldi hafa skrifað undir það?“

Björn Leví Gunnarsson, fyrrverandi þingmaður Pírata, vísar til þess í athugasemd að á þessum tíma, skömmu eftir bankahrun, hafi stuðningur almennings við Evrópusambandsaðild verið meiri. „Þegar það var hægt að toga atkvæði til Framsóknar um þetta mál, þá var það notað,“ skrifar Björn Leví.