Konu sem dreifði nektarmyndum af þáverandi eiginmanni sínum og annarri konu árið 2020 var í dag gert að greiða manninum miskabætur samkvæmt niðurstöðu Héraðsdóms Reykjaness.

Málið hefur komið víða við í dómskerfinu síðan það kom upp fyrir tæpum fimm árum. Forsaga þess er að konan hafði farið fram á skilnað í júlí 2020 eftir 16 ára hjónaband með manninum. Fann hún í framhaldinu nektarmyndir af honum og annarri konu á Facebook Messenger aðgangi mannsins og sendi þær á manninn, mágkonu hans og vinkonu sína með tölvupósti með yfirskriftinni „Þú ert viðbjóður“.

Konan vildi fyrir dómstólum meina að tilgangurinn með tölvupóstinum hefði verið að sýna viðtakendum að samskipti eiginmannsins og konunnar hafi falið í sér lítilsvirðingu við syni þeirra. Þarna hafi ekki verið um „lostugt athæfi“ að ræða af hennar hálfu og því ekki um brot af kynferðislegum toga að ræða.

Hæstiréttur staðfesti í janúar dóm Landsréttar þess efnis að konan hefði gerst sek um kynferðisbrot með dreifingu myndanna enda hafi verið um „lostugt athæfi“ að ræða. Var hún dæmd í þriggja mánaða skilorðsbundið fangelsi. Landsréttur hafði hins vegar ómerkt fyrri dóm Héraðsdóms Reykjaness hvað varðar einkaréttarkröfur brotaþola og fór málið því aftur í hérað.

Konan hafði þegar náð dómsátt við hina konuna um greiðslu á 680.000 kr. í miskabætur og vexti, en brjóst konunnar höfðu sést á tveimur nektarmyndum sem fylgdu tölvupóstinum.

Héraðsdómur ákvarðaði því nú aðeins miskabætur vegna dreifingar konunnar á nektarmynd af eiginmanni sínum sem sýndi getnaðarlim hans. Ákvarðaði Héraðsdómur að konan skyldi greiða manninum 486.500 kr. með vöxtum vegna athæfisins.