Maðurinn sem leitað var á Esjunni aðfararnótt þriðjudags og fannst látinn í hlíðum Kistufells hét Viktor Armann Kambizson og var aðeins 22 ára gamall. 

Frá þessu greinir móðir Viktors, Hrönn Harðardóttir, á Facebook-síðu sinni, þar sem hún þakkar björgunarsveitarfólki og lögreglu fyrir aðgát og aðstoð. 

„Þessi fallegi, skemmtilegi yndislegi drengur, hann Viktor minn er látinn. Aðeins 22 ára gamall. Hann er göngumaðurinn sem var leitað að í Esjunni í vikunni. Hann fórst af slysförum í hlíðum Kistufells,“ segir hún.

„Við færum björgunarsveitarfólki sem leitaði tímunum saman og langt fram á nótt okkar bestu þakkir. Sem og áhöfn þyrlunnar sem fann drenginn minn. Og lögreglunni sem hélt utan um okkur og gaf reglulega upplýsingar um stöðu mála. Og þeim sem komu heim til okkar og tilkynntu andlátið. Fyrir nærgætni og hlýju. Góður drengur er fallinn frá, allt of snemma. Elsku Viktor minn, hvíldu í friði.“

Slys eru algeng á Esjunni og eru banaslys á fjöllum hvergi fleiri. Árið 2013 lést 58 ára gömul kona þegar hún féll í fjallinu. Árið 2020 lést 23 ára gamall maður í snjóflóði við Móskarðshnúka. Þremur árum áður lést annar maður í snjóflóði neðan við Hátind. Þá létust tveir piltar árið 1979 í snjóflóði vestan við Þverfellshorn, en algengasta gönguleiðin á fjallið liggur þar austan megin. Kistufell, þar sem ungi maðurinn lést, er austar, handan við Gunnlaugsskarð. Þar er bratti meiri en við Þverfellshorn.