Rithöfundasamband Íslands hvetur rithöfunda til að sniðganga Storyel með því að beita sér gegn því að verk þeirra verði sett inn á streymisveituna, þar til sænska streymisveitan semur við rithöfunda um „sanngjarnt endurgjald“.
Sambandið hefur sent frá sér áskorun til Storytel. „Rithöfundasamband Íslands skorar á Storytel á Íslandi að ganga til samninga við sambandið um rammasamning sem myndi fela í sér sanngjarnt og gagnsætt endurgjald til höfunda af útgáfu hljóðbóka,“ segir þar. „Þar til slíkir samningar hafa verið gerðir hvetur Rithöfundasambandið félagsmenn til þess að beita sér fyrir því að ný verk verði ekki sett inn á streymisveituna.“
Að mati rithöfunda er um lífsspursmál að ræða fyrir bókmenntalíf landsmanna. „Án sanngjarnra höfundarréttargreiðslna fær bókmenntalíf ekki þrifist hjá þjóð sem kennir sig á tyllidögum við bókmenntir.“
Fram hafa komið dæmi þess að rithöfundar fái greitt mun minna fyrir streymi á efni þeirra á Storytel heldur en fyrir sölu bókar, eða um 1/7 hluta.
Samtímis skora rithöfundar á Storytel að forðast notkun gervigreindar í þýðingum.
„Rithöfundasambandið skorar jafnframt á Storytel á Íslandi að tryggja að gervigreind verði hvorki notuð til þess að skrifa bækur né þýða þær yfir á íslensku,“ segir í yfirlýsingunni.
„Rithöfundasambandið minnir Storytel á að fyrirtækið byggir grundvöll sinn á hugverkum rithöfunda og þýðenda, og að bókmenntir og listir verða eingöngu skapaðar af listamönnum en ekki vélum.“
Í vetur kynnti Storytel fyrsta gervigreindarhöfund fyrirtækisins, Rosy Lett. Smásögubók hennar, New Horizon, var gefin út í tilraunaskyni.
Þetta vekur ekki síst áhyggjur þar sem tónlistarstreymisveitan Spotify hefur verið staðin að því að miðla efni sem eignað er Íslendingum en enginn raunverulegur tónlistarmaður er að baki.
Storytel var stofnað árið 2006. Streymisveitan er í eigu ýmissa sjóða, fyrirtækja og einstaklinga um allan heim. 54% af eignarhlutum er enn í Svíþjóð.
Athugasemdir (1)