Átta þing­menn Sam­fylk­ing­ar­innar, þar á meðal Dagur B. Egg­erts­son fyrr­ver­andi borg­ar­stjóri, hafa lagt fram frum­varp þess efnis að end­ur­vekja systkina­for­gang á leik­skólum. Frum­varpið felur í sér breyt­ingu á lögum um leik­skóla þar sem sveit­ar­stjórnum „er heim­ilt að haga inn­ritun með til­liti til þess að systk­ini eða börn sem hafa sama lög­heim­ili geti sótt sama leik­skóla, sem og með hlið­sjón af nálægð leik­skóla við lög­heim­ili barna“. Frum­varp­inu hefur verið útbýtt og er á dag­skrá þing­fundar í dag. 

„Þetta er löngu tíma­bært og búið að kalla eftir þessu í mörg ár,“ segir Dagbjört Hákon­ar­dóttir, fyrsti flutn­ings­maður frum­varps­ins, sem er að leggja frum­varpið fram í fjórða sinn. Dagbjört starf­aði sem lög­maður hjá Reykja­vík­ur­borg áður en hún tók sæti á Alþingi þar síð­asta haust og þekkir vel til leik­skóla­mála, sér í lagi álits borg­ar­lög­manns frá 2008 sem varð til þess að systkina­for­gangur á leik­skóla borg­ar­innar var afnum­inn. Í álit­inu kom fram að reglan gangi í ber­högg við jafn­ræð­is­reglu stjórn­sýslu­rétt­ar­ins. Helstu rök snúa að því að með systkina­for­gangi gengju yngri börn framar eldri börnum eða börnum í sama árgangi sem ekki ættu eldri systk­ini í við­kom­andi leik­skóla. Dagbjört segir að með frum­varp­inu sé verið að gera laga­heim­ild­ina ótví­ræða. „Það er ótví­ræður hagur allra sem í þess­ari borg búa, og þó víðar væri leitað, að fjöl­skyldur þurfi ekki að fara borg­ar­enda á milli með sitt­hvort barnið sitt, bara svo það fái leik­skóla­vist.“ 

Í grein­ar­gerð frum­varps­ins kemur fram að systkina­for­gangur muni nýt­ast barna­fjöl­skyldum og muni ekki koma niður á börnum sem ekki eiga eldra systk­ini. „Samvera systk­ina á sama leik­skóla felur í sér dýr­mæta og mik­il­væga upp­lifun barna á fyrsta skóla­stig­inu þegar hún er mögu­leg, og sveit­ar­fé­lögum á að vera gert kleift að gera ráð­staf­anir til að koma af fremsta megni í veg fyrir að fjöl­skyldur þurfi að fara hverfa á milli til að sækja leik­skóla með til­heyr­andi álagi á umferð,“ segir í grein­ar­gerð­inni. 

Í því skyni að tryggja börnum, sem ekki eiga eldra systk­ini á leik­skóla, aðgengi að leik­skóla innan eigin hverfis er einnig lagt til í frum­varp­inu að heim­ila sveit­ar­fé­lögum að móta reglur sem tryggi börnum for­gang inn á leik­skóla með hlið­sjón af nálægð heim­ilis við leik­skóla með svip­uðum hætti og gildir um inn­ritun í grunn­skóla. 

Sveitarfélögin ráði ennþá ferðinni

Systkina­for­gangur hefur verið sveigj­an­legri í öðrum sveit­ar­fé­lögum en Reykja­vík en Dagbjört segir mein­ingu frum­varps­ins ekki vera að skylda sveit­ar­fé­lög til að inn­leiða systkina­for­gang. „Borginni verður eftir sem áður alveg frjálst að hafa þetta óbreytt, kjósi kjörnir full­trúar að gera það svo. Hér er ein­fald­lega um að ræða heim­ild til þess að taka til­lit til fleiri þátta en bara kenni­tölu og aldur barns.“ 

Með breyt­ing­unni telja flutn­ings­menn að tryggja megi að sem flest börn geti hafið leik­skóla­göngu í námunda við heim­ili sitt á til­skildum aldri. Dagbjört seg­ist þó gera sér grein fyrir að frum­varpið leysi ekki vand­ann í leik­skóla­málum í heild sinni, sem snýr að biðlistum og mönnun. „Þetta mál leysir ekki allt, en þetta er skref í rétta átt. En þetta er sam­fé­lags­legt vanda­mál sem við verðum að leysa.“