Þegar ferða­tösk­urnar hlunkast niður á færi­bandið á flug­vell­inum að lok­inni flug­ferð bíða far­þeg­arnir í ofvæni eftir sinni tösku og anda svo léttar þegar þeir sjá hana birt­ast. Maður sem beið eftir tveimur töskum við færi­bandið á Kastrup í febr­úar 2022 sá þær birt­ast á band­inu og hélt svo með þær áleiðis að græna útgang­inum. En lengra komst hann ekki, toll­verðir báðu hann vin­sam­leg­ast að koma með þeim afsíðis og opna tösk­urnar.

Maðurinn sagð­ist vera með 13 rauð­víns­flöskur í tösk­unum, í hverri flösku 1,5 lítri. Þegar toll­verð­irnir skrúf­uðu tapp­ann af fyrstu flösk­unni kom í ljós að inni­haldið var ekki rauð­vín, heldur fljót­andi kókaín og í öllum hinum flösk­unum 12 var inni­haldið það sama. Samtals voru 19,5 lítrar af fljót­andi kóka­íni í flösk­unum 13.

Í til­kynn­ingu lög­regl­unnar dag­inn eftir „flösku­fund­inn“ kom fram að flösk­urnar 13 hefðu sést við til­vilj­ana­kennda athugun toll­varða á far­angri sem fer um flug­völl­inn. Síðar kom í ljós að sú lýs­ing var ekki sann­leik­anum sam­kvæm.

Operation Bianco

Eins og áður sagði var mað­ur­inn með ferða­tösk­urnar hand­tek­inn í febr­úar 2022 og var síðar dæmdur fyrir ólög­legan inn­flutn­ing. Í októ­ber á síð­asta ári hand­tók lög­reglan 10 menn. Þeir eru grun­aðir um að hafa átt aðild að kóka­ín­mál­inu. Ástæðu þess að rann­sóknin hefur tekið svona langan tíma segir lög­regla vera að málið hafi reynst mjög umfangs­mikið og teygt anga sína víða.

Lög­reglan hafði lengi fylgst með, og hlerað, síma manns sem tal­inn er hafa staðið á bak við inn­flutn­ing­inn og reyndar komið víðar við sögu í und­ir­heimunum, eins og full­trúi lög­regl­unnar orð­aði það í til­kynn­ingu.

Nú hafa 6 af mönn­unum 10 verið ákærðir en 4 til við­bótar var sleppt eftir yfir­heyrslur. Alls 8 til við­bótar eru grun­aðir um að tengj­ast mál­inu. Menn­irnir eru á aldr­inum 43 til 69 ára, hinn meinti höf­uð­paur yngstur. 

 Minkaskinn, peningar og kókaín

Það var ekki að ástæðu­lausu að lög­reglan sagði að rann­sóknin hefði teygt anga sína víða og verið umfangs­mikil. Stundum eru inn­kaup þannig að ein­hver fer með pen­inga í tösku, eða greiðslu­kort og kaupir varn­ing, fer með þær heim og þar með er mál­inu lokið. Þannig var það ekki í Operation Bianco, eins og málið heitir í skrám lög­reglu.

Lög­reglan hefur haldið spil­unum þétt að sér, en ýmis­legt hefur þó verið gert opin­bert. Samkvæmt upp­lýs­ingum lög­reglu hafa við­skiptin með kóka­ín­kaupin farið þannig fram að dönsk minka­skinn hafa verið seld til nokk­urra landa, lög­regla nefndi Kína og Pólland. Fyrir pen­ing­ana voru keypt eit­ur­lyf, í þessu nefnda til­viki fljót­andi kókaín, sem svo var flutt til Dan­merkur og selt þar og hugs­an­lega víðar.

Við­skiptin fóru fram gegnum milli­liði sem allir þurftu að fá borgað fyrir sitt. Öll voru þessu við­skipti utan hefð­bund­inna leiða, pen­inga­þvætti segir lög­reglan. Upphæðin sem um ræðir jafn­gildir að minnsta kosti 700 millj­ónum íslenskra króna, á árunum 2020 til 2024.

 Af hverju minkaskinn?

Eins og mörgum er ef til vill í fersku minni var danski minka­stofn­inn, sam­tals milli 15 og 17 millj­ónir dýra, sleg­inn af síðla árs 2020, að skipan stjórn­valda. Síðar kom í ljós að ef til vill  hefði svona rót­tæk, og kostn­að­ar­söm, aðgerð ekki verið nauð­syn­leg, en það er önnur saga.

Öllum danska minka­stofn­inum var fargað, bein­línis með húð og hári. Mikil ringul­reið skap­að­ist í kringum „minka­málið“ eins og það var kallað og enn eru ekki öll kurl komin til grafar í því máli, varð­andi bóta­greiðslur og fleira.

Eins og kunn­ugt er eru minkar aldir vegna skinn­anna og dönsk minka­skinn hafa lengi verið þau eft­ir­sótt­ustu í heimi. Kín­verjar hafa um langt ára­bil sóst eftir dönskum minka­skinnum og verið til­búnir að greiða hátt verð fyrir. Þessi mark­aður var því sem næst þurrk­aður út með einu penna­striki.

Töluðu upphátt um peningaþvætti og minkaskinn

Samkvæmt gögnum sem lög­regla hefur undir höndum hafa menn sem þekkja til í minka­brans­anum rætt í síma og á net­inu við höf­uð­paur­inn fyrr­nefnda og ýmsa sam­starfs­menn hans. Þar var rætt um verð á minka­skinnum, hvar sé hægt að selja þau og svo fram­vegis.

Fram kom í máli full­trúa lög­regl­unnar á fundi með frétta­mönnum að menn, fleiri en einn og fleiri en tveir, sem tengd­ust minka­eldi í Danmörku hefðu verið í nánum tengslum við kóka­ínsal­ana og selt þeim skinn.

 Formaðurinn undrandi

Þegar frétta­maður danska útvarps­ins, DR, ræddi við Tage Pedersen, for­mann sam­taka danskra loð­dýra­bænda, kvaðst hann ekki þekkja til máls­ins umfram það sem hann hefði heyrt og séð í fjöl­miðlum.

Hann sagði að þessar fréttir hefðu komið sér mjög á óvart, ekki síst að svo virt­ist sem umtals­vert magn hvítra minka­skinna hefðu verið til í land­inu löngu eftir að búið væri að farga öllum stofn­inum. „Ég vissi að það voru til skinn en ekki að þau væru í þús­unda­tali, ég er miður mín yfir þessum fréttum af kol­legum mínum,“ sagði Tage Pedersen.

 Tveir hafa játað

Rétt­ar­höld í Operation Bianco-mál­inu hófust í síð­ustu viku í Kolding. Fyrir liggja játn­ingar tveggja manna í mál­inu en aðrir hafa neitað sök eða ekki tekið afstöðu til ákæru. Allt að átta ára fang­elsi getur beðið hinna ákærðu verði þeir fundnir sekir.