Sólveig Anna Jónsdóttir, formaður Eflingar stéttarfélags, hefur sent erindi til sérleyfisveitingakeðjanna Subway IP LLC og Hard Rock Cafe International og vekur þar athygli „á þátttöku sérleyfishafa þeirra hér á landi í réttindabrotum gegn vinnandi fólki, ólögmætu athæfi og lagabrotum“, samkvæmt því sem segir í fréttatilkynningu frá Eflingu.
Þar kemur fram að í erindunum bendi Sólveig Anna á að Stjarnan ehf., sérleyfishafi Subway á Íslandi, og HRC Ísland ehf., sem heldur á sérleyfi fyrir Hard Rock Cafe á Íslandi, hafi „að líkindum bæði tekið þátt í stofnun ólögmæts gervistéttarfélags, sem stýrt sé af atvinnurekendum.“
Í bréfunum biður hún erlendu móðurfélögin um að „rannsaka“ hegðun íslensku sérleyfishafanna til að tryggja að þeir „uppfylli gildandi vinnulöggjöf, sem og hvers kyns siðferðileg vinnubrögð tengd fyrirtækinu“.
Í erindum Sólveigar Önnu út til þessara móðurfélaga Subway og Hard Rock Cafe á alþjóðavísu segir meðal annars: „Þó Efling geri sér grein fyrir að sérleyfishafar starfi sem sjálfstæð eining undir vörumerki ykkar, þýða tengslin að framganga þeirra gætu brugðið slæmu ljósi á orðspor ykkar á heimsvísu.“
Barátta gegn gervikjarasamningi
Þessar bréfasendingar formanns Eflingar eru áframhald á þeim slag sem stéttarfélagið hefur ráðist í vegna starfsemi stéttarfélagsins Virðingar og kjarasamnings þess við SVEIT, samtök fyrirtækja á veitingamarkaði.
Þann samning segir Efling vera ólögmætan, enda sé Virðing gervistéttarfélag, stofnað af fyrirtækjaeigendunum sjálfum í því skyni að ráðast gegn kjörum starfsfólks í veitingageiranum.
Efling segir að auk þess innihaldi samningurinn fjölmörg ákvæði sem brjóti gegn íslenskum lögum og Evrópureglugerðum.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Athugasemdir