Mögulegar meirihlutastjórnir miðað við stöðuna

Nokkrir mögu­leikar blasa við þegar kemur að myndun nýrrar rík­is­stjórnar en allir byggj­ast þeir á for­send­unni á að þing­menn hennar nái meiri­hluta á þingi, þar sem þing­menn­irnir eru 63.

Tekið skal fram að enn stendur taln­ing yfir og þetta er því fyrst og fremst sam­kvæm­is­leikur á þess­ari stundu, og er hér byggt á töl­fræði en ekki mál­efnum. Til að ná meiri­hluta þarf minnst 32 þing­menn.

Miðað við stöð­una gætu Sam­fylk­ing, Sjálf­stæð­is­flokkur og Viðreisn myndað meiri­hluta með 41 þing­manni. Þá gætu Sam­fylk­ing og Viðreisn einnig myndað meiri­hluta með Flokki fólks­ins, með alls 36 þing­menn. 

Sjálf­stæð­is­flokkur, Viðreisn og Mið­flokk­ur­inn gætu sömu­leiðis myndað 33 þing­manna meiri­hluta.

Allir ofan­greindir mögu­leikar miða við þriggja flokka stjórn.

Einnig er í stöð­unni að Sjálf­stæð­is­flokkur, Flokkur fólks­ins, Mið­flokkur og Framsókn myndi meiri­hluta með 36 þing­mönnum.  Þarna er um fjóra flokka að ræða sem gera má ráð fyrir að geti flækt stjórn­ar­mynd­un­ar­við­ræður enn meira en þegar um er að ræða þrjá flokka.

Hér má nálg­ast töl­fræði í raun­tíma með nýj­ustu upp­lýs­ingum í graf­ískri fram­setn­ingu á vef Heim­ild­ar­innar.

Einn mögu­leiki til við­bótar er í stöð­unni þegar kemur að þriggja flokka stjórn, miðað við stöð­una á fjórða tím­anum aðfar­arnótt 1. des­em­ber. Þetta er meiri­hluti Sam­fylk­ingar, Við­reisnar og Fram­sóknar. Þessir flokkar gætu myndað meiri­hluta með 32 þing­mönnum en það þarf einmitt 32 til að ná meiri­hluta. Með þann þing­manna­fjölda má þó lítið sem ekk­ert koma upp í sam­starf­inu því meiri­hlut­inn væri fall­inn við atkvæða­greiðslu á þingi þó aðeins einn þing­maður væri á móti því sem við­kom­andi rík­is­stjórn vildi ná fram.

Þegar þetta er birt hafa verið talin yfir 98 þús­und atkvæði en á kjör­skrá eru rúm­lega 268 þús­und. 

Samkvæmt tölum sem nú hafa borist úr öllum kjör­dæmum eru yfir­gnæf­andi líkur á að stjórn­mála­flokkum sem eiga sæti á Alþingi fækki úr átta í sex, að bæði Píratar og Vinstri græn falli af þingi og til við­bótar, að Sós­í­alista­flokk­ur­inn fái engan þing­mann kjör­inn. 

Þetta kemur til með að breyta lands­lag­inu á þing­inu tölu­vert, en flokkar á Alþingi hafa verið átta tals­ins frá árinu 2017. Síðast náðu ein­ungis sex flokkar kjöri í alþing­is­kosn­ing­unum árið 2013.

Eins og Heim­ildin greindi frá í kvöld tók Inga Sæland, for­maður Flokks fólks­ins, jákvætt í hug­mynd um rík­is­stjórn með Sam­fylk­ing­unni í beinni útsend­ingu í kosn­inga­sjón­varpi RÚV í nótt. Kristrún Frosta­dóttir, for­maður Sam­fylk­ing­ar­innar, sem vinnur stór­sigur í kosn­ing­unum, lýsti efa­semdum um rík­is­stjórn með Sjálf­stæð­is­flokki. 

Þegar þátt­ar­stjórn­andi Rík­is­út­varps­ins, Sigríður Hagalín Björns­dóttir, bað Þorgerði Katrínu Gunn­ars­dóttur, for­mann Við­reisnar, og Kristrúnu Frosta­dóttur, um við­brögð við orðum Ingu, þagði Þor­gerður, en Kristrún svar­aði og hló: „Við erum ekk­ert að fara að mynda hérna rík­is­stjórn í beinni útsend­ingu.“

Þor­gerður Katrín Gunn­ars­dóttir svar­aði því til að „nóttin væri ung“ en lagði ekki mat á rík­is­stjórn með Sam­fylk­ingu og Flokki fólks­ins. Hún lagði almennt áherslu á sam­henta rík­is­stjórn í orðum sínum á kosn­inga­nótt.

Kristrún var­aði við rík­is­stjórn „með alltof breitt lit­róf“. „Við verðum að fá sam­stíga rík­is­stjórn og það verður lyk­il­at­riði ef við förum í stjórn­ar­mynd­un­ar­við­ræður,“ sagði Kristrún.