Ég ætla mér að búa í mið­bænum í fram­tíð­inni. Í gömlu timb­ur­húsi og eiga tvo ketti sem heita herða­tré og jóla­tré,“ sagði Bryndís Klara Birg­is­dóttir og hnippti í vin­konu sína á Menn­ing­arnótt. 

Því miður varð þessi draumur hennar ekki að veru­leika. Bryndís Klara varð fyrir hnífstungu­árás sama kvöld og lést nokkrum dögum síðar af sárum sínum. Hún var 17 ára gömul. 

Jarð­ar­för Bryn­dísar Klöru fór fram í Hall­gríms­kirkju í dag. Þétt var setið í kirkj­unni og um 4.500 manns fylgd­ust með jarð­ar­för­inni í beinu streymi. Enn víðar minnt­ist fólk Bryn­dísar Klöru en boðað var til minn­ing­ar­stöðu framan við Björg­un­ar­mið­stöð­ina í Skóg­ar­hlíð á sama tíma og jarð­ar­förin fór fram. Lands­menn allir voru jafn­framt hvattir til að kveikja á frið­ar­kerti í dag til að minn­ast Bryn­dísar Klöru. 

Í minn­ing­ar­orðum sínum sagði séra Guðni Már Harð­ar­son að þjóðin byggi við laskaða örygg­is­kennd í kjöl­far árás­ar­innar og að ráða­menn þyrftu að grípa til aðgerða. For­eldrar Bryn­dísar Klöru hafa kallað eftir því að kær­leikur verði að eina vopn­inu í sam­fé­lag­inu og að óbæri­leg fórn Bryn­dísar Klöru muni bjarga manns­lífum.

„Sorg ykkar er sorg okkar allra,“ sagði Guðni við jarð­ar­för Bryn­dísar Klöru í dag og beindi orðum sínum til for­eldra Bryn­dísar Klöru, Birgis og Iðunnar, og yngri systur hennar Vigdísar Eddu.

„Við treystum því að líf Bryn­dísar Klöru muni bjarga mörgum manns­lífum. Kæru ráða­menn. Það verður ekki nóg að staf­setja eitt­hvað á blað. Við sem sam­fé­lag búum við laskaða örygg­is­kennd og þurfum að finna fyrir aðgerð­unum,“ sagði Guðni. 

Ósanngjarnt líf

Hann vitn­aði í orð Vigdísar sem skrif­aði Bryndísi Klöru bréf þegar útlit var fyrir að hún myndi ekki hafa það af.

Mynd: Anton Brink

„Þú ert besta systir í heimi og ég mun sakna þín. Þú verður bráðum besti eng­ill í heimi. Ég vil að þú sért hér heima að leika með mér en svona er lífið. Þótt það sé ósann­gjarnt þá verður maður að berj­ast,“ skrif­aði Vigdís og teikn­aði undir 20 hjörtu. 

„Það er ekk­ert rétt­læti í því að við séum hér í dag,“ sagði Guðni. „Það er svo stutt síðan hún gekk hér í hópi vina á menn­ing­arnótt.“

Guðni vék í lokin tali sínu að miklum bangsím­o­ná­huga Bryn­dísar Klöru og því þegar hún spurði for­eldra sína hvort hún mætti fá sér bangsím­on­húð­flúr á inn­an­verðan hand­legg­inn. Þau bentu henni á að henni þætti það kannski ekki eins krútt­leg hug­mynd þegar hún yrði átt­ræð. Hún gæti þó tekið ákvörðun þegar hún yrði 18 ára. En nú hafa for­eldr­arnir ákveðið að fá sér slíkt húð­flúr í minn­ingu Bryn­dísar Klöru og varðar þau lítið um það hvað öðrum kann að finn­ast þegar þau verða átt­ræð.

Bangsímon fylgdi Bryndísi Klöru og mun nú fylgja foreldrunum

Snjáð tusku­brúða af bangsímon fylgdi Bryndísi Klöru gjarnan. Vigdís Edda lagði þessa brúðu hjá Bryndísi Klöru á gjör­gæsl­unni. Hún sá jafn­framt til þess að brúðan fylgdi henni í kist­una, sagði Guðni.

For­eldrum Bryn­dísar Klöru hafa borist ótal kveðjur og þeim hélt áfram að rigna inn með­fram streym­inu frá jarð­ar­för­inni. Á meðal þeirra sem sendu inn sína kveðju fyrir jarð­ar­för­ina var Vigdís Finn­boga­dóttir, fyrr­ver­andi for­seti. 

„Sorg ykkar er sorg okkar allra,“ sagði Vigdís.