Bjarni Bene­dikts­son for­sæt­is­ráð­herra segir að ákvörðun Bjarkeyjar Olsen Gunn­ars­dóttur um að gefa heim­ild fyrir hval­veiði ekki hafa komið sér á óvart. Skömmu fyrir hádegi í dag til­kynnti mat­væla­ráðu­neytið um þá ákvörðun um veita Hval hf. veiði­leyfi til veiða á lang­reyðum. Leyfi­legt veiði­magn verður 128 dýr og gildir leyfið út veiði­tíma­bilið 2024.

„Ég hins vegar tek eftir því að ráð­herr­ann segir rétt að veita leyfið núna til eins árs og færir fyrir því rök sem mér finnst alveg vera skilj­an­leg,“ sagði Bjarni og bætti við að stjórn­völd þurfi að öllum lík­indum að skoða hvað hefði betur mátt fara í mál­inu hefur dreg­ist á lang­inn.

„Það sem við þurfum kannski að spyrja okkur er hvort að stjórn­sýslan í þessum málum sé nægi­lega skil­virk og veit þann fyr­ir­sjá­an­leika sem nauð­syn­legur er fyrir þessa starf­semi.“

Aðspurður hvernig and­rúms­loftið hafi verið á rík­is­stjórn­ar­fund­inum þar sem mat­væla­ráð­herra til­kynnti ráð­herrum um ákvörðun sína segir Bjarni and­rúms­loftið hafi verið ágætt. „Það var bara ágætis stemm­ing með þessa nið­ur­stöðu.“

Leggur áherslu á að lögum og reglum sé fylgt

Spurður hvort hann væri ánægður með nið­ur­stöð­una sagði Bjarni að hann vilji að lögum og reglum sé fylgt og stjórn­sýslan sé skil­virk. 

„Það er það sem skiptir mestu máli. Þegar við erum að fram­kvæma lög og fylgja reglum um þessi efni, þar með talið stjórn­sýslu­reglum, að þá séum við að vanda okkur og séum skil­virk í því og það var svona eitt af þeim atriðum sem hafa verið í umræð­unni að und­an­förnu.“

Þá sagð­ist Bjarni skilja vel gagn­rýn­ina sem beinst hefur að stjórn­völdum, sér­stak­lega því hversu langan tíma hefur tekið að kom­ast að þess­ari nið­ur­stöðu.

„Ég skil alveg að það hafi komið fram athuga­semdir um tím­ann og til dæmis eiga mjög margir hags­muna að gæta, fjöldi fólks sem var að von­ast til þess að hafa af þess­ari starf­semi góðar tekjur og atvinnu í sumar. Þannig það er ekki létt­vægt mál þegar slíkar athuga­semdir ber­ast, en nú er komin nið­ur­staða,“ segir Bjarni.

Formaður VG virðir ákvörðun matvælaráðherra

Guð­mundur Ingi Guð­brands­son, félags- og vinnu­mark­aðs­ráð­herra og for­maður VG, seg­ist virða ákvörðun ráð­herra þrátt fyrir að hval­veiðar gangi gegn póli­tískum skoð­unum hans.  

„Þetta er bara það sem hún verður að gera. Hún verður að gefa út leyfið og gefur það sam­kvæmt stjórn­ar­skrá. Hún gefur leyfið til skamms tíma, með eins fáum dýrum og hægt er. Auðvitað er mín póli­tíska skoðun sú að við eigum að hætta hval­veiðum á Íslandi. Bæði er mik­ill stuðn­ingur fyrir því hjá almenn­ingi, eins og skoð­ana­kann­anir hafa sýnt, þró­unin hjá alþjóð­lega svið­inu er öll með þessum hætti,“ sagði Guð­mundur Ingi. 

Sigurður Ingi segir sátt ríkja innan ríkisstjórnar 

Þegar Sigurður Ingi Jóhanns­son steig út af fundi rík­is­stjórnar var hann spurður hvort hann hefði áhyggjur af eft­ir­málum af því hversu langan tíma tók að afgreiða málið. „Það er bara liðin tíð. Nú liggur ákvörðun fyrir og ég er ánægður með það,“ sagði Sigurður Ingi.

Spurður hvort hann væri sam­mála því að breyta þurfi lögum um hval­veiðar eins sagði Sigurður Ingi að vinna væri nú þegar hafin við að leggja mat á núver­andi lög­gjöf. „Það var sett ákveðin vinna í gang og það eru öfl­ugir aðilar að því sem hyggj­ast skila áliti í haust eða vetur.“

Þá taldi Sigurður Ingi að rík­is­stjórn­ar­sam­starf­inu hafi ekki verið stefnt í hættu vegna máls­ins, ákvörðun mat­væla­ráð­herra muni ekki koma til með að kljúfa stjórn­ar­sam­starfið.

„Þessi ákvörðun er bara eðli­leg í ljósi þess sem við höfum verið með á stefnu­skrá þess­arar rík­is­stjórnar. Það var ekki á stefnu­skrá hennar að breyta stefnu Íslands í hval­veiðum.“