Komnar eru tölur úr öllum kjördæmum og búið er að telja meginþorra atkvæða í þeim stærstu. Samkvæmt stöðunni eins og hún er nú verður Halla Tómasdóttir, forstjóri B Team, næsti forseti Íslands. Hún hefur fengið flest atkvæði í öllum kjördæmum. Sem stendur mælist hún með 32,4 prósent fylgi og er með töluvert forskot á Katrínu Jakobsdóttur, fyrrverandi forsætisráðherra. Halla vildi sjálf ekki ganga að því vísu að hún væri búin að vinna í viðtali við RÚV en Björn Skúlason, eiginmaður hennar, velti hins vegar fyrir sér hvernig það yrði að búa á Bessastöðum í sama viðtali. 

„Mér sýnist allt stefna í að Halla Tómasdóttir verði næsti forseti Íslands,“ sagði Katrín, sá forsetaframbjóðandi sem stefnir í að lenda í öðru sæti í kosningunum í dag, í viðtali við RÚV rétt fyrir klukkan eitt í kvöld. Hún óskaði Höllu til hamingju með sigurinn og sagði að hún vissi ekkert hvað tæki við. Aðspurð hvort hún myndi bjóða sig aftur fram til forseta var svarið skýrt: „Nei, þetta geri ég ekki aftur.“

Katrín er sem stendur með 26,3 prósent atkvæða og því munar 6,1 prósentustigum á henni og Höllu. Tveir aðrir frambjóðendur eru með fylgi í tveggja stafa tölu: Halla Hrund Logadóttir orkumálastjóri er með 15,4 prósent og Jón Gnarr, leikari og fyrrverandi borgarstjóri, er með 11,4 prósent. Sá frambjóðandi utan Höllu Tómasdóttur, sem er að fá miklu meira fylgi en hún mældist með í skoðanakönnunum, sem er lengst frá því að ná þeim árangri sem spár gerðu ráð fyrir er Baldur Þórhallsson. Hann hefur fengið 8,1 prósent atkvæða. 

Sennileg forsetahjónBjörn Skúlason kyssir eiginkonu sína á kosningavöku Höllu Tómasdóttur í Grósku í nótt.

Mynd: Golli

Arnar Þór Jónsson, varaþingmaður og fyrrverandi dómari, er með fimm prósent atkvæða og aðrir minna. Flestir hinna frambjóðendanna virðast ætla að verða töluvert langt frá því að ná 1.500 atkvæðum, sem þýðir að þeir fengu ekki öll atkvæði þeirra sem mæltu með þeim í framboð.

Búið er að telja 86.551 atkvæði.