Friðsæld og slökun mun einkenna jörðina Öxl á Snæfellsnesi ef áform eigenda um að byggja þar jógasetur verða að veruleika. Þeir reka þar reyndar þegar gistihús og bjóða upp á aðstöðu til jógaiðkunar í þeim húsum sem fyrir eru á jörðinni.

Þjóðsögur miklar, sumar studdar ákveðnum heimildum, segja ábúandann á Öxl í lok sextándu aldar, Björn Pétursson, hafa myrt að minnsta kosti níu manns. Segja sumar sögur að fjöldinn hafi verið nær 15. Er hann almennt kallaður Axlar-Björn og sagður eini raðmorðingi Íslands.

En nú er öldin önnur og andinn á Öxl það svo sannarlega. Eigendur jarðarinnar hafa óskað eftir breytingu á deiliskipulagi sem felur í sér byggingarreit undir jógasetur þar sem einnig yrðu gistirúm fyrir 20 manns. Þá hyggja þeir á endurbætur og enduruppbyggingu á núverandi mannvirkjum að Öxl.