Ístörfum þingsins fór Diljá Mist Einarsdóttir, þingmaður Sjálfstæðisflokksins, hörðum orðum um aðgerðarleysi Samfylkingarinnar í borgarstjórn Reykjavíkur. Diljá Mist sagði að skilaboð Samfylkingarinnar á flokksstjórnarfundi hefðu vakið athygli sína. „Hún telur landsmenn hafa miklar væntingar til þess að hún komi þeim til bjargar, rífi hlutina í gang og rétti af ranga stefnu Íslands. Þessir landsmenn hljóta í það minnsta að búa annars staðar en í Reykjavík.“
Diljá Mist sagði að þeir sem búi í borginni þekktu vel ferilskrá Samfylkingarinnar sem hefur stýrt borginni í áratugi. „Við borgum himinhá fasteignagjöld en fáum ekki leikskólapláss fyrir börnin okkar. Við erum með yfirfullar ruslatunnur þrátt fyrir hlutastarf við flokkun og við finnum ekki samastað í borginni á yfirfullum og rándýrum þéttingarreitum enda flýja borgarbúar unnvörpum í nágrannasveitarfélögin og lengra. Við sitjum föst í bílaumferð á hverjum degi.“
Undir lok ræðunnar sagði Diljá Mist að Samfylkingunni væri nær að lofa Reykvíkingum að rífa hlutina í gang og „koma borginni aftur á rétta braut. Þar hefur Samfylkingin umboð og tækifæri, ekki í framtíðinni heldur núna.“
Mistök að gera ekki ráð fyrir nýrri Kvennadeild á nýja Landspítalanum
Næsti ræðumaður var Birgir Þórarinsson, þingmaður Sjálfstæðisflokksins, sem ræddi slæma stöðu bygginga og álma á vegum Landspítalans vegna myglu. „Ljóst má vera að verkefni að uppræta myglu í húsnæði Landspítalans er stórt og það er brýnt.“
Birgir beindi sjónum sínum sérstaklega að kvennadeildinni. „Þar hefur verið viðvarandi mygluvandamál um árabil og nýlega bárust fréttir af því að mygla er þar mun meiri en talið var í fyrstu. Töluverð langtímaveikindi eru meðal starfsmanna sem rekja má til myglu og skjólstæðingar kvennadeildar sem eru með mygluóþol eiga erfitt um vik að dvelja í húsinu vegna myglu.“
Nefndi Birgir dæmi um að starfsmenn sneru ekki aftur til vinnu eins og staðan væri nú. „Húsnæði kvennadeildar var ekki hannað fyrir þá starfsemi sem fer fram í dag. Starfsemi hefur vaxið mikið á undanförnum árum og er farið að þrengja að henni. Ofan á þetta bætist síðan þessi alvarlega staða vegna myglu.“
Birgir sagði að það veki óneitanlega spurningar hvers vegna kvennadeildin hafi ekki verið með í fyrirætlunum um flutninga yfir á nýja Landspítalans og sagði það hafðu verið mikil mistök.
„Ísland er kjörlendi fyrir smálánafyrirtæki“
„Við tölum ekki nógu mikið um hákarla í þessum sal,“ voru upphafsorð Jóhanns Páls Jóhannessonar, þingmanns Samfylkingarinnar. „Ísland er kjörlendi fyrir smálánafyrirtæki sem notfæra sér neyð fólks, sem notfæra sér og græða á þeirri stöðu að fleiri og fleiri heimili hafa átt erfitt með að ná endum saman í tíð þessarar ríkisstjórnar sem hefur misst efnahagsmálin gersamlega úr böndunum eins og kristallast í mikilli og þrálátri verðbólgu og einhverjum hæstu vöxtum í hinum vestræna heimi.“
Jóhann Páll sagði „hákarlana“ eða smálánafyrirtækin, notfæra sér örþrifaráð fólks.
„Hér voru sett innheimtulög árið 2008 og í kjölfarið reglugerð um hámarksfjárhæð innheimtukostnaðar, mikilvæg skref í rétta átt, en þessar reglur eru komnar til ára sinna og duga ekki til að verja neytendur gegn ósanngjörnum innheimtuaðferðum og smálánafyrirtækin komast mjög auðveldlega í kringum þessar reglur.“
Jóhann Páll og þingmenn Samfylkingarinnar hafa lagt fram lagafrumvarp „um að samanlagður kostnaður við frum-, milli- og löginnheimtu verði aldrei hærri en höfuðstóll kröfunnar sem er til innheimtu hverju sinni. Þetta eru breytingar sem Neytendasamtökin hafa lengi kallað eftir, þetta er í takt við reglur sem hafa verið settar í Svíþjóð og Danmörku og ég trúi ekki öðru,“ sagði hann.
Athugasemdir