Kleppjárnsreykjaskóli í Reykholtsdal, sem tilheyrir Grunnskóla Borgarfjarðar, verður rifinn og ný bygging reist. Sveitarstjórn Borgarbyggðar hefur gengið til samninga við Sjamma ehf. um endurbygginguna sem hefst á niðurrifi. Áætluð verklok eru haustið 2025. Tilboð Sjamma hljóðar upp á liðlega 1 milljarð króna. 

Um er að ræða stærstu fjárfestingu Borgarbyggðar um árabil. Lagt var fram sérstakt mat á áhrifum fjárfestingarinnar á fjárhag sveitarfélagsins og var niðurstaða þess sú að Borgarbyggð ráði vel við fjárfestinguna, segir í tilkynningu frá sveitarfélaginu.

Árið 2021 komu í ljós miklar rakaskemmdir og mygla í skólahúsnæðinu að Kleppjárnsreykjum í kjölfar þess að nokkrir nemendur höfðu veikst. Verkfræðistofan Efla var fengin til að gera úttekt og var sú skýrsla „svört“ að sögn sveitarstjórnarfulltrúa.