Arndís Anna Kristínardóttir Gunnarsdóttir, þingkona Pírata, var handtekin á skemmtistaðnum Kíkí á föstudagskvöld. Hún hafði verið talsverðan tíma á salerni staðarins og samkvæmt frásögn hennar stóð til að vísa henni út af staðnum vegna þessa.
Við það komst hún í uppnám og lögreglan var kölluð til.
Frá þessu greinir Arndís Anna a Facebook-síðu sinni en greinir ekki nánar frá ástæðu þess að vísa átti henni út af staðnum. Færslan birtist eftir að mbl.is hafði greint frá handtökunni.
Í færslunni segir: „Ég brá mér á skemmtistað á föstudagskvöld, eins og gengur og gerist, og fór á einn minn uppáhaldsstað, Kiki. Ég fór á salernið og var búin að vera þar sjálfsagt í talsverðan tíma þegar dyraverðir opna hurðina.
Mér brá við þetta og við að það stæði til að bera mig út með valdi, þegar mér fannst ekki tilefni til. Ég hef skilning á því að starf dyravarða á skemmtistöðum sé erfitt og ekki síst með fullt hús af fólki í misjöfnu ástandi, þó mín upplifun hafi verið sú að þarna hafi framganga þeirra verið óþarflega harkaleg og niðurlægjandi. Ég hef talað við fyrirsvarsmann staðarins sem bað mig afsökunar fyrir þeirra hönd, sem mér þykir afar vænt um.“
Þar segist Arndís Anna vera þakklát lögreglunni fyrir þeirra viðbrögð og fagmennsku, og fyrir alúðina sem þau sýndu sér í kjölfarið, enda hafi hún komist í talsvert uppnám við það sem hún kallar aðfarir. „Það að lögreglan taki útkall frá hinsegin skemmtistað alvarlega, hvers eðlis sem það er, og bregðist svona skjótt við er sérstaklega mikilvægt og yljaði það mér um hjartaræturnar í öllum þessum ósköpum."
Athugasemdir (5)