JBT býður mörg hundruð milljarða í Marel og vill taka yfir félagið

Klukkan fjögur í nótt var birt til­kynn­ing í Kauphöll Íslands um að Marel, næst verð­mætasta félag­inu í Kauphöll Íslands, hefði borist óskuld­bind­andi yfir­lýs­ing varð­andi mögu­legt til­boð í öll hluta­bréf í félag­inu. 

Í til­kynn­ing­unni kom ekki fram hver hafi sett fram þessa yfir­lýs­ingu en þar sagði að henni fylgi „óaft­ur­kall­an­leg yfir­lýs­ing Eyris Invest hf., eig­anda 24,7 pró­sent hluta­fjár í Marel, um sam­þykki Eyris Invest hf. verði til­boð lagt fram í tengslum við vilja­yf­ir­lýs­ing­una.“ Eyrir Invest er langstæsti ein­staki eig­andi Marel.

Ekkert kemur fram um hvaða gengi hið óskuld­bind­andi yfir­tökutil­boð miðar við en mark­aðsvirði Marel í lok dags í gær var 264,5 millj­arðar króna.

Í til­kynn­ing­unni sagði að Marel muni „fara yfir og meta fram­an­greinda óskuld­bind­andi vilja­yf­ir­lýs­ingu af kost­gæfni með hlið­sjón af lang­tíma­hags­munum félags­ins og allra hlut­hafa þess. Ekki liggur fyrir nein vissa um hvort umrædd yfir­lýs­ing muni leiða til form­legs skuld­bind­andi yfir­tökutil­boðs, eða skil­mála þess.“

Klukkan 10:20 birt­ist svo önnur til­kynn­ing þar sem fram kemur að það sé John Bean Technologies Corporation (JBT), sem er stór alþjóð­leg mat­væla­fram­leiðslu­sam­stæða með höf­uð­stöðvar í Chicago í Banda­ríkj­unum, sem hafi lagt fram til­boðið. Þar kemur fram að um val­frjálst yfir­tökutil­boð sé að ræða sem „verði aðeins sent að und­an­geng­inni ásætt­an­legri nið­ur­stöðu áreið­an­leika­könn­unar og stjórn­ar­sam­þykki JBT.“

Þá kemur fram að mögu­legt val­frjálst yfir­tökutil­boð JBT, þegar og ef það verður lagt fram, verði háð eft­ir­far­andi fyr­ir­vörum:

1. Samþykki við­eig­andi eft­ir­lits­að­ila
2. Samþykki hlut­hafa JBT
3. Að a.m.k. 90 pró­sent hlut­hafa Marel sam­þykki til­boðið

Dagsloka­gengi bréfa í Marel í gær var 350 krónur á hlut. Tilboð JBT er upp á 482 krónur á hlut, eða tæp­lega 38 pró­sent yfir dagsloka­gengi gær­dags­ins, fyrir allt útistand­andi hlutafé í Marel. Tillaga JBT að verð­mati er byggð á þeirri for­sendu að útistand­andi hlutir séu 754 millj­ónir og staða áhvílandi lána nemi 827 millj­ónum evra. Gengi bréfa í Marel hefur rokið upp í Kaup­höll­inni í morgun eftir til­kynn­ing­arnar, en sem stendur nemur hækk­unin tæpum 29 pró­sentum.

Óskuld­bind­andi vilja­yf­ir­lýs­ingin gerir ráð fyrir að 25 pró­sent af end­ur­gjald­inu verði greitt með reiðufé og 75 pró­sent verði í formi hluta­bréfa í JBT. „Það kemur jafn­framt fram að hlut­hafar Marel muni eiga u.þ.b. 36 pró­sent af hlutum í JBT eftir mögu­leg við­skipti. Engar frek­ari upp­lýs­ingar koma fram eða liggja fyrir um gengi hluta í JBT eða hugs­an­legt skiptigengi.“

Stríðið um Marel

Heim­ildin fjall­aði ítar­lega um stríðið sem geisar um yfir­ráð yfir Marel í síð­ustu viku. Þar kom meðal ann­ars fram að feðgarnir Árni Oddur Þórð­ar­son og Þórður Magn­ús­son, sem eru stærstu eig­endur Eyris Invest, teldu einn stærsta banka lands­ins, Arion banka, vera að reyna að tryggja Sam­herja og Stoð­um yf­ir­ráð í Mar­el. 

Liður í þeirri fléttu hefði verið að leysa til sín hluta af eign Árna Odds, sem er var for­stjóri Marel í ára­tug en var knú­inn til að segja af sér í byrjun mán­aðar, í Eyri Invest. Ásakanir liggja fyrir gagn­vart Arion banka þess efnis að bank­inn hafi átt í sam­ræðum við áður­nefnd fjár­fest­ing­ar­fé­lög um að kaupa þá hluti áður en gengið var frá veð­kalli gagn­vart Árna Oddi, en það var gert eftir að veð­þekja lána hans fór undir 150 pró­sent. Arion banki hefur stað­fast­lega neitað því að hafa átt í slíkum sam­ræðum, bæði fyrir og eftir að veð­kallið var fram­kvæmt. 

Þá hafa erlendir sjóðir verið að skoða það um tíma að taka yfir Marel. Ein þeirra leiða sem þeir hafa verið með til skoð­unar er að reyna að kaupa hlut Eyris og ann­ars stórs hlut­hafa og mynda með því yfir­töku­skyldu í félag­inu.

Þá hafði Árni Oddur átt í beinum við­ræðum við stóran íslenskan aðila um aðkomu að Marel áður en að veð­kall­inu kom. Sá aðili er Samherja-sam­stæðan. 

Við veð­kallið fór hlutur feðganna í Eyri Invest – Þórður hafði lána hluta af sinni eign sem veð fyrir lánum Árna Odds – niður í 29 pró­sent en deilur standa um þau 9,3 pró­sent sem Arion banki seg­ist halda á en hefur ekki gert upp við feðgana eins og lána­samn­ingur og lög segja til um.

Sagði af sér og fór í greiðslustöðvun

Árni Oddur telur Arion banka ekki hafa hagað sér í góðri trú og telur sig hafa sett fram nægj­an­leg ný veð til að hafa staðið við þá lána­samn­inga sem bank­inn ákvað að gjald­fella. Við það telur hann að veð­þekjan hafi farið yfir 200 pró­sent, sem lána­samn­ing­ur­inn krafð­ist að hún yrði, og þar með gæti Arion banki ekki leyst til sín bréf hans. Bankinn var ósam­mála.

Í kjöl­far veð­kalls­ins sagði Árni Oddur af sér sem for­stjóri Marel og bað um greiðslu­stöðvun. Í til­kynn­ingu sagði Árni Oddur að greiðslu­stöðv­unin væri vegna „þeirrar réttaró­vissu sem skap­ast hefur vegna aðgerða Arion banka, sem leyst hefur til sín hluta hluta­bréfa minna í Eyri Invest, leið­andi fjár­festis í Marel, þrátt fyrir að ákvæðum lang­tíma­lána­samn­ings við bank­ann hafi verið full­nægt.“ 

Greiðslu­stöðvun Árna Odds var fengin fram með dóms­úr­skurði. Hún var veitt til þriggja vikna og rennur því út 28. nóv­em­ber næst­kom­andi. Á þeim tíma verður kannað hvaða eignir séu til staðar hjá Árna Oddi og hvaða skuldir, og hvort eign­irnar dugi fyrir skuld­unum.