„Bókmenntahátíð Iceland Noir kynnir einstakan bókmenntaviðburð í Reykjavík, sunnudaginn 19. nóvember 2023 kl. 16 í Eldborgarsal Hörpu. Hillary Rodham Clinton, fyrrum utanríkisráðherra Bandaríkjanna og forsetaframbjóðandi, kemur fram í Hörpu og ræðir meðal annars um skáldsöguna State of Terror [...] Stofnendur Iceland Noir hátíðarinnar, Ragnar Jónasson og Yrsa Sigurðardóttir, Kynna Clinton og Penny á svið.“
Svona leit lýsing á viðburðinum út á heimasíðu Hörpu en textinn hefur nú verið fjarlægður sem og allar auglýsingar Iceland Noir bókmenntahátíðarinnar um viðburðinn en hátíðin hafði auglýst viðburðinn bæði á heimasíðu sinni og samfélagsmiðlum.
Miðasala Hörpu staðfestir að búið sé að fjarlægja upplýsingar um viðburðinn af heimasíðu Hörpu að ósk viðburðarhaldara, Iceland Noir, og ástæðan sé sú að vegna þess að uppselt sé á viðburðinn þurfi ekki að auglýsa hann frekar. Þetta er hins vegar ekki almenn stefna Hörpu varðandi viðburði og auglýsingu á þeim og tíðkast almennt ekki.
Í viðtali við Vísi þann 14. september er haft eftir Yrsu Sigurðar að skipuleggjendur hafi „togað í alla þá spotta sem hægt var að toga í til að tryggja komu Clinton á hátíðina.“
Ekki ritskoðun heldur sjálfsagður réttur
Viðburðurinn var gagnrýndur á samfélagsmiðlum og snéru þau mótmæli einkum að því að Hillary Clinton hafi talað gegn vopnahléi á Gaza og „dreift fals upplýsingum um stöðuna þar,“ eins og einn mótmælandi komst að orði. Öll ummæli sem voru gagnrýnin á viðburðinn voru hins vegar fjarlægð af samfélagsmiðlum.
Einn af skipuleggjendum hátíðarinnar segist ekki telja það vera ritskoðun heldur sé eingöngu verið að „eyða spammi sem hrannast upp á síðu hátíðarinnar,“ starfsmaðurinn „hljóti að hafa rétt til þess að stýra því hvað fær að vera það, rétt eins og aðrir sem noti þessa samfélagsmiðla.“ Ummælin hafi verið fjarlægð til þess að gæta orðspors hátíðarinnar.
Bergþóra Snæbjörnsdóttir rithöfundur vakti athygli á málinu á samfélagsmiðlum í gær. „Það að fá pólitíkusa er afstaða,“ skrifar Bergþóra og bætir við: „Það að henda óhentugum athugasemdum af síðunni ykkar er afstaða. Þetta er þöggun.“ Bergþóra kallar eftir því að hátíðin afbóki Hillary ásamt því að hvetja rithöfunda til þess að afboða sig á hátíðina.
Sniðganga vegna menningarþvottar
Þetta er ekki í fyrsta sinn sem bókmenntahátíðin hefur verið gagnrýnd eða hvatt sé til þess að sniðganga hana. Í fyrra afbókaði rithöfundurinn Sjón komu sína á hátíðina vegna veru Katrínar Jakobsdóttur á hátíðinni. Í færslu á Twitter sagði Sjón að stjórnendur hátíðarinnar leyfðu forsætisráðherra að koma fram sem manneskju menningar á sama tíma og grimm meðferð ríkisstjórnar hennar á hælisleitendum væri ekki veitt athygli.
Tilkynning Sjóns kom í kjölfar lögregluaðgerðar þar sem fimmtán hælisleitendur voru fluttir með valdi úr landi, meðal þeirra var hælisleitandi í hjólastól. Ítrekað hefur verið reynt að fá viðbrögð Ragnars Jónassonar og Yrsu Sigurðardóttur vegna þessarar fréttar en án árangurs.
Athugasemdir