Mjólkursamsalan, sem er stærsti söluaðili ferna á Íslandi, hvetur stjórnvöld til að taka endurvinnslu á fernum föstum tökum í ljósi umfjöllunar um að fernurnar séu að langstærstu leyti brenndar í orkuvinnslu en ekki endurunnar, líkt og neytendum hefur verið talin trú um. Í tilkynningu sem birt er á vef fyrirtækisins, og dagsett í gær, 5. júní, er ábyrgðinni á meðferð fernanna vísað á Úrvinnslusjóð, Sorpu og þeim fyrirtækjum sem tekið hafa á móti pappa- og pappírsumbúðum.
„Með greiðslu úrvinnslugjalds hefur Mjólkursamsalan treyst á að þessir ferlar séu í lagi og eftirlit sé haft með því að svo sé,“ segir meðal annars í tilkynningu fyrirtækisins. Þar er einnig fullyrt að endurvinnsluferlar fyrir TetraPak umbúðir, sem mjólkurfernur eru, sé sannarlega til staðar. Skilja þurfi að pappann í þeim frá plastinu í þar til gerðum endurvinnslustöðvum sem staðsettar séu víða um heim. „Mjólkursamsalan harmar mjög að þeir endurvinnsluferlar sem í boði eru fyrir blandaðar drykkjarumbúðir séu ekki nýttir sem skyldi.“
Til að ítreka endurvinnsluhæfni ferna er tekið dæmi um eigin innkaup Mjólkursamsölunnar: „Sé fernum beint í réttan endurvinnslufarveg er því sannarlega hægt að veita þeim framhaldslíf. Mjólkursamsalan verslar til að mynda salernispappír sem unninn er úr gömlum fernum.“
Mjólkursamsalan vísar í samstarf sitt við Sorpu frá 1997 um endurvinnslu á drykkjarfernum.
Í dag sendi þessi sama Sorpa hins vegar frá sér tilkynningu um fernumálið þar sem segir að fyrirtækið Smurfit Kappa, sem tekur við pappír frá Sorpu, nær engum árangri í endurvinnslu á fernum frá Íslandi. Þær hafa því allar verið brenndar til orkuframleiðslu. Fernur rýri endurvinnslumöguleika á öllum pappír sem flokkaður er með þeim. Stjórn Sorpu hefur, í þessu ljósi, falið öðru fyrirtæki að flokka TetraPak fernurnar, svo sem þær frá Mjólkursamsölunni, frá öðrum pappír.
Í tilkynningunni baðst Sorpa afsökunar á sínum þætti í að hafa ekki miðlað með skýrari hætti hver afdrif drykkjarferna sem íbúar á höfuðborgarsvæðinu flokka eru.
Eins og fram kom í umfjöllun Heimildarinnar um örlög íslenskra drykkjarferna hefur Mjólkursamsalan, ásamt íslenskum endurvinnslufyrirtækjum, hvatt neytendur til að skola fernur og flokka með pappír svo endurvinna megi þær og gefa þeim „framhaldslíf“. Allar fernurnar innihalda þó plast til viðbótar við pappír. Sumar þeirra, til að mynda þær sem geyma G-mjólkurvörur eins og Kókómjólk, innihalda líka málma. Allt að 25 prósent af þyngd fernanna getur því verið annað en pappír.
Boðaðar aðgerðir Sorpu, um að aðskilja fernurnar frá öðrum pappír, mun kosta um 75 milljónir króna árlega. Ekki er ljóst hvernig innheimt verður fyrir þeim aukakostnaði en fernur og pappír bera sama úrvinnslugjald í dag.
Eða getur verið að MS sé of háð TetraPak og geti því ekki ????
En er það ekki umhugsunarvert hve stór hluti af vörunni er ætlað eyðingargjald vegna umbúða?