SORPA hefur fengið það staðfest hjá hollenska fyrirtækinu Smurfit Kappa að fernur, sem þangað eru sendar með endurvinnanlegum pappír, séu ekki endurunnar heldur endurnýttar í orkuvinnslu. Þetta er í samræmi við það sem kom fram í umfjöllun um endurvinnslu á fernum í síðasta tölublaði Heimildarinnar, en þar var upplýst að fernurnar sem heimili landsins eru að þrífa, pakka og flokka séu að mestu ekki endurunnar heldur brenndar í sementsverksmiðjum.
Í tilkynningu frá SORPU vegna málsins, sem send var út í dag, segir að Smurfit Kappa, sem hefur tekið við pappír frá SORPU frá miðju síðasta ári, nái engum árangri í endurvinnslu á þeim fernum sem SORPA hefur sent til endurvinnslu. „Þær fara því allar í endurnýtingarfarveg, það er í brennslu til orkuframleiðslu. Samkvæmt upplýsingum frá Smurfit Kappa kemur fram að fernur rýri endurvinnslumöguleika þess pappírs sem er flokkaður með þeim í endurvinnsluferlið og því mikilvægt að ná þeim úr pappírsstraumnum.
SORPA biðst afsökunar á sínum þætti í að hafa ekki miðlað með skýrari hætti hver afdrif drykkjarferna sem íbúar á höfuðborgarsvæðinu flokka eru.“
Kostar 75 milljónir á ári
Stjórn SORPU hefur falið framkvæmdastjóra fyrirtækisins að gera þær breytingar sem þörf er á til að bæta úr þessu og senda pappírinn fyrst í flokkun hjá Stena Recycling, móttökuaðila SORPU í Svíþjóð á endurvinnsluefnum.
Það mun fela í sér að fernur, sem eru svokallaðar Tetra Pak umbúðir, verði flokkaðar frá öðrum pappír og pappa frá SORPU og þeim komið í betri farveg en nú er. Gert er ráð fyrir að kostnaður við þetta verði um 75 milljónir króna á ári. „Leiðbeiningar SORPU til íbúa á höfuðborgarsvæðinu um flokkun á fernum eru því þær sömu og þær hafa verið hingað til: að flokka fernur með öðrum pappír. Ef ekki verða þær urðaðar á urðunarstað SORPU í Álfsnesi.“
Í tilkynningu SORPU segir að ljóst sé að mörg þeirra hugtaka sem séu notuð í tengslum við úrgangsmeðhöndlun séu keimlík, til dæmis hugtökin endurvinnsla og endurnýting. „Endurvinnsla, sem hefur gegnum tíðina verið almennt hugtak fyrir aðra úrgangsmeðhöndlun en urðun, felur til dæmis í sér að hráefni er notað í sama tilgangi og upphaflega í stað nýs hráefnis – eins og þegar áldós er endurunnin í nýja áldós. Endurnýting er hins vegar þegar hráefni kemur í stað annars hráefnis, til dæmis þegar umbúðir eru brenndar til að framleiða orku í stað þess að brenna kolum eða olíu. SORPA hvetur framleiðendur til að taka til skoðunar val sitt á umbúðum með það að markmiði að forðast samsettar umbúðir, sem erfitt er að endurvinna og jafnframt endurskoða upplýsingar á vörum sínum um endurvinnslumöguleika til að tryggja að þar komi fram réttar upplýsingar um endurvinnslumöguleika.“
Eða er MS of háð TetraPak?
Hvað um það, er það ekki ótrúlegt hvað endurvinnsla er stór hluti af verði (sagt er 60kr/fernu)?