Sagan af konunni sem þráði að uppgötva eitthvað sem mannkynið vissi ekki að væri mögulegt og dýpkaði röddina til að vera tekin alvarlega er sögð meistaralega vel í hlaðvarpinu The Dropout. Elizabeth Holmes ætlaði að breyta og bjarga heiminum með byltingarkenndri blóðskimunartækni. Hún stundaði nám í efnaverkfræði við Stanford-háskóla en hætti í náminu og stofnaði líftæknifyrirtækið Theranos, þá aðeins 19 ára gömul. Holmes hélt því fram að hún hefði þróað byltingarkennda blóðskimunartækni sem gæti greint hundruð sjúkdóma.  

Rebecca Jarvis, viðskiptafréttastjóri á ABC-fréttastofunni, fer ítarlega yfir sögu Holmes í The Dropout og reynir í leiðinni að svara spurningum á borð við hvernig „yngsti milljarðamæringurinn sem byrjaði frá grunni“, „næsti Steve Jobs“ og ein af áhrifamestu einstaklingum ársins 2015 samkvæmt Time Magazine, varð sakfelld og dæmd fyrir að blekkja fjárfesta. Og hvernig náði hún að halda blekkingunni gangandi svona lengi? 

Mál Holmes hefur vakið athygli víða um heim, ekki bara í Kísildalnum, og sjónvarpsþættirnir Dropout hafa notið mikilla vinsælda. Amanda Seyfried fer með hlutverk Holmes í þáttunum og Jarvis ræðir við hana í sérstökum bónusþætti hlaðvarpsins. 

Bónusþættirnir eru fleiri, meðal annars um réttarhöldin, en Holmes var dæmd í 11 ára fangelsi í nóvember í fyrra. Holmes átti að hefja afplánun í 27. apríl en afplánuninni hefur verið frestað þar til áfrýjunarbeiðni Holmes hefur verið tekin til umfjöllunar. Holmes getur því varið tíma með eiginmanni sínum og börnum, William, sem tveggja ára og Invicta, sem fæddist í febrúar, þar til annað kemur í ljós. Sögunni er því hvergi nærri lokið og það er aldrei að vita nema að bónusþættir The Dropout verði fleiri.