Í dag tóku í gildi breytingar á hvernig íslenskar krónur eru skráðar í alþjóðlegum kerfum kortafyrirtækjanna Visa International og American Express. Sams konar breytingar verða hjá Mastercard á morgun. Breytingin felur í sér að hætt verður að nota aura, eða tvo aukastafi, við útreikning gengisins. Allar upphæðir verða framvegis í heilum krónum en ekki í aurum. 

Tilgangur breytinganna er að samræma skráninguna við alþjóðlega gjaldmiðlastaðla. Í tilkynningu frá bönkunum til viðskiptavina í vikunni kom fram að breytingarnar hafi verið undirbúnar vel en truflanir geti samt sem áður komið upp, einna helst ef verslað er í íslenskum krónum hjá erlendum aðilum.  

120 þúsund krónur teknar af korti fyrir 1.200 króna lestarmiða

Sú varð raunin og samkvæmt upplýsingum Heimildarinnar hafa upphæðir hundraðfaldast. Þannig voru 120 þúsund krónur teknar af íslensku korti fyrir lestarmiða í Danmörku sem kostaði 1.200 krónur. 

Rúnar Pálmason, upplýsingafulltrúi Landsbankans, segir í samtali við Heimildina að vandræðin einskorðist við danskar krónur og að færslur verði leiðréttar eins fljótt og auðið er. Í tilkynningu á vef bankans segir að um sé að ræða tímabundna truflun í greiðslukerfum í Danmörku vegna breytinga á því hvernig íslenskar krónur eru skráðar í kerfum kortafyrirtækisins Visa International. 

Kortafærslur Indó voru gerðar óvirkar um tíma en opnað hefur verið aftur fyrir kortin.

Mynd: Skjáskot

Indó lokaði fyrir allar greiðslur um tíma þegar ljóst var að í stað þess að fella niður aurana bættust tvö núll við í staðinn. „Við erum að vinna í öllum leiðréttingum á þessum færslum,“ segir Hjördís Elsa Ásgeirsdóttir, markaðsstjóri Indó, í samtali við Heimildina.  

Samkvæmt upplýsingum Heimildarinnar tengist vandamálið einum færsluhirði í Danmörku sem er með um 80 prósent markaðshlutdeild. Viðskiptavinir allra banka á Íslandi eru hvattir til að hafa samband til að fá færslur leiðréttar.

Í tilkynningu frá alþjóðlega fjártæknifyrirtækinu Rapyd kemur fram að korthafar fá í flestum tilfellum ekki heimild á kortið þar sem færslur margfaldast sem hefur áhrif á heimildir kortanna. Fari færslur í  gegn verða þær leiðréttar. 

Uppfært klukkan 12:48: 

Í nýrri tilkynningu frá Landsbankanum kemur fram að búið er að koma í veg fyrir truflanir á greiðslum með íslenskum greiðslukortum í Danmörku. Ekki er þó útilokað að áfram verði einhverjar truflanir í dag.

„Okkur þykir miður að viðskiptavinir hafi orðið fyrir óþægindum vegna þessa. Við biðjumst velvirðingar og þökkum fyrir þolinmæðina. Við munum áfram vinna að úrlausn málsins með okkar samstarfsaðilum,“ segir í tilkynningu bankans.