Fyrstu íbúðirnar í nýjum fjölbýlishúsum á Héðinsreit, á mótum Mýrargötu og Ánanausta, eru nú boðnar til sölu. Um er að ræða tvö fjölbýlishús af sex húsum á reitnum sem byggð verða af fasteignaþróunarfélagi sem heitir Festir. Dýrasta íbúðin í þessum tveimur húsum er með þeim dýrustu sem sett hefur verið á markað á Íslandi, en uppsett verð fyrir hana eru 416 milljónir króna.
Fyrir 416 milljónir króna fæst 278 fermetra íbúð á 7. hæð með tveimur svefnherbergjum, fataherbergi, þvottahúsi, þremur baðherbergjum og þrennum svölum. Auk þess fylgja íbúðinni tvö bílastæði í bílakjallara og lyfta hússins gengur beint inn í íbúðina. Í sama húsi er önnur íbúð á sjöundu hæðinni verðlögð á 355 milljónir.
Sala húsanna fer af stað á morgun, en á sérstökum vef sem settur hefur verið upp til að kynna fasteignaþróunarverkefnið, sem gengur undir nafninu Vesturvin, má kynna sér eitt og annað um íbúðirnar sem boðnar eru til sölu; stærð, verð og fyrirhugað innra skipulag eignanna.
Kjartan Hallgeirsson fasteignasali hjá Eignamiðlun, annarri af tveimur fasteignasölum sem sjá um söluna á húsunum fyrir fasteignaþróunarfélagið, segir við Heimildina að söluvefurinn hafi verið mikið skoðaður undanfarna daga, en auk þess að setja vefinn í loftið hefur athygli verið vakin á verkefninu með auglýsingum í fjölmiðlum.
Hvort athyglin sem vefurinn hafi fengið skili sér svo í kauptilboðum er annað mál, en kemur væntanlega í ljós á næstu dögum.
„Markaður fyrir dýrar íbúðir er alltaf eyland, lýtur sér lögmálum“
Kjartan bendir á að enn sé langt í afhendingu húsanna sem nú eru til sölu, eins og öllum sem leggja leið sína framhjá byggingarreitnum má vera ljóst, en húsin tvö, sem eiga að standa næst hringtorginu sem tengir Ánanaust við verslunarhverfið á Grandanum eru rétt byrjuð að potast upp úr jörðinni.
„Grunnvinnan tekur lengstan tíma,“ segir Kjartan. Stefnt er að því að hæðunum fjölgi ört á næstu misserum, en bæði húsin eiga að verða sjö hæða há og munu breyta ásýnd svæðisins mikið. Stefnt er að afhendingu íbúðanna um mitt sumar 2024.
Efsta hæðin í húsi V1 þegar sögð seld
Húsin sem eru komin í sölu hafa heitið V1 og V2 á vef Festis og dýrustu íbúðirnar á efstu hæðinni sem hér voru nefndar að ofan eru í húsi V2. Íbúðirnar á efstu hæðinni í húsi V1 eru hins vegar sagðar seldar nú þegar, en þær eru minni en íbúðirnar sem eru til sölu í húsi V2 á 355 og 416 milljónir króna.
Í samtali við Heimildina segir Kjartan að næstu hús á vegum Festis byggist upp á komandi árum og að uppbygging og sala íbúða á reitnum verði líklega um fimm ára verkefni. Hann væntir þess að spurn verði eftir nýjum íbúðum á þessum stað í vesturhluta borgarinnar.
Spurður út í dýrustu íbúðirnar og markaðinn fyrir þær sérstaklega segir Kjartan rétt að þetta sé með hæstu verðum sem sett hafi verið á íbúðir í fjölbýlishúsum á Íslandi, „ekkert langt frá þessum verðum sem voru í Austurhöfninni“, en þar seldist til dæmis ein 354 fermetra horníbúð með útsýni yfir Reykjavíkurhöfn á 500 til 600 milljónir króna, samkvæmt því sem heimildir Morgunblaðsins hermdu undir lok árs 2021.
„Markaður fyrir dýrar íbúðir er alltaf eyland, lýtur sér lögmálum,“ segir Kjartan og nefnir að ekki séu margar íbúðir í húsunum tveimur sem falli í þennan flokk dýrra lúxusíbúða. „Það þarf ekki marga kaupendur að sex íbúðum,“ segir fasteignasalinn, en á söluvef húsanna má sjá að auk lúxusíbúðanna fjögurra á 7. hæðum húsanna tveggja eru sex íbúðir að auki sem kosta yfir 200 milljónir króna.
Í húsunum sex sem Festir hyggst reisa á reitnum verða í heild sinni 210 íbúðir og verður einn sameiginlegur bílakjallari fyrir þau hús undir reitnum, með alls 167 bílastæðum fyrir íbúa. Auk íbúðanna verða svo um 900 fermetrar af atvinnurými á jarðhæðum húsanna og segist fasteignaþróunarfélagið leggja „mikla áherslu á að í atvinnurýmum verði starfsemi sem er íbúðabyggðinni ekki til trafala vegna ónæðis“.
Athugasemdir (2)