Fréttir

FME telur Íslandsbanka mögulega hafa brotið lög við einkavæðinguna

Sáttaferli á milli Fjármálaeftirlits Seðlabanka Íslands og Íslandsbanka er farið af stað eftir að eftirlitið sendi bankanum frumniðurstöður sínar þess efnis að lög hafi mögulega verið brotin við einkavæðingu 22,5 prósenta hlutar ríkisins í bankanum á síðasta ári.

9. janúar 2023 · 18:58

Birtist upphaflega í Stundinni fyrir 4 árum.

Fjármálaeftirlitið telur að Íslandsbanki hafi mögulega brotið lög þegar 22,5 prósenta hlutur ríkisins í Íslandsbanka var seldur í lokuðu útboði á síðasta ári. Sáttaferli á milli bankans og Fjármálaeftirlitsins er hafið, samkvæmt tilkynningu frá Íslandsbanka til Kauphallarinnar, sem send var út í kvöld. Litlar upplýsingar koma þó fram í hverju ætluð brot hafi falist en Íslandsbanki var einn af umsjónaraðilum útboðsins sem fram fór á hlutum í bankanum.

„Stjórnendur bankans taka frummat FME alvarlega. Eins og áður hefur verið greint frá hefur bankinn þegar gert breytingar á innri reglum og ferlum og mun halda slíkri vinnu áfram í sáttarferlinu,“ segir í tilkynningu bankans sem er stutt og gefur engar upplýsingar um hver brotin gætu mögulega verið.

Fulltrúi bankans segir við Stundina að ekki verði gefið upp hvaða lög voru brotin og ber við að trúnaður sé um sáttaferlið. Fulltrúi Fjármálaeftirlitsins vill heldur ekki veita upplýsingar um hvaða lög eftirlitið telur að hafi mögulega verið brotin. Með vísan í þagnarskyldu tjáir FME sig ekki um málið. Þar með talið um það hvort og þá hvers vegna FME hafi gert kröfu um að ekki yrði greint frá frekari efnisatriðum.

Kjarninn greindi frá því í kvöld að í enskri útgáfu tilkynningarinnar komi fram að Íslandsbanki hafi óskað eftir sáttaferlinu. Það kemur hins vegar ekki fram í íslensku útgáfu tilkynningarinnar, þar sem þó kemur fram að í „frummatinu er athygli vakin á heimildum FME til að leggja á stjórnvaldssektir og ljúka málinu með sátt“. Í ensku útgáfunni er þessu fylgt eftir með orðunum: „FME hefur samþykkt, að beiðni bankans, að hefja sáttaferli.“ Í þeirri íslensku stendur einfaldlega: „Sáttarferli er hafið.“

„Stjórnendur bankans taka frummat FME alvarlega.“

úr tilkynningu Íslandsbanka

Einkavæðingin fór fram í lokuðu útboði þar sem tilteknir aðilar, sem töldust hæfir, stundum kallað fagfjárfestar, gátu keypt hluti ríkisins í bankanum. Það var ólíkt fyrri einkavæðingu á ríkishlutum í bankanum þegar opið útboð fór fram þar sem almenningi bauðst að kaupa hluti, líkt og margir gerðu. Í seinna, lokaða útboðinu, var faðir Bjarna Benediktssonar fjármálaráðherra einn þeirra sem fékk að kaupa hluti. Það sætti sérstakri gagnrýni þar sem Bjarni er sá ráðherra sem fer með eignarhluti ríkisins í fjármálafyrirtækjum.

Það er þó ekki bara vera Benedikts Sveinssonar á kaupendalistanum sem hefur sætt gagnrýni. Sú staðreynd að starfsmenn söluaðila útboðsins voru meðal kaupenda hefur sætt gagnrýni og mun vera eitt af því sem Fjármálaeftirlitið hefur haft til rannsóknar. Stundin hefur áður greint frá því að FME rannsaki líka hvernig farið var með skilgreiningu á fagfjárfestum í útboðinu, en fram hefur komið að það hafi í einhverjum tilvikum þótt nægja að fjárfestarnir óskuðu eftir endurskilgreiningu á sjálfum sér.

Í skýrslu Ríkisendurskoðunar, sem fjallaði þó takmarkað um þennan þátt einkavæðingarinnar, sagði um þetta: „Að auki var horft til fullyrðinga frá fjárfestunum sjálfum um að þeir teldust hæfir fjárfestar en bankinn þurfti að meta upplýsingar þess efnis sjálfstætt.“

Síðast uppfært klukkan 19.57 með samanburði á enskri og íslenskri tilkynningu Íslandsbanka

Kjósa

Hvernig finnst þér þessi grein? Skráðu þig inn til að kjósa.

Deila

Athugasemdir (6)

Skráðu þig inn til að skrifa athugasemd eða kjósa.

Kári Jónsson skrifaði
12. janúar 2023 14:55

Bjarni Ben fjármála ber mesta ábyrgð á meintum lögbrotum, Bjarni Ben skipar stjórn Bankasýslunnar, sem fól 5-verðbréfabröskurum að hringja í (vini sína) helstu fjármálasóða íslandssögunnar, verðbréfa-braskararnir hafa fengið 400-milljónir fyrir meintan glæp. 8-starfsmenn Íslandsbanka misnotuðu innherja-upplýsingar ásamt verðbréfa-bröskurunum og keyptu sjálfir í lokuðu tilboðsferli ætluðu langtíma-fjárfestum sem myndu verja bankann þegar á móti blæs. Fjármálasóðunum var hleypt inn í miðju sölu-RÁNS-ferlinu, þ.á.m. pabba Bjarna Ben fjármála sem hafði þær skyldur að samþykkja/hafna tilboðum samkvæmt lögum um sölu fjármálafyrirtækja. FME telur ásættanlegt að hefja sáttameðferðar-ferli án þess að FME hafi lagt loka hönd á sína rannsókn, frekar en að vísa þessum meintu fjárglæfrum beint til lögreglu og saksóknara. Þetta er réttarríki Sjálfstæðisflokksinns í hnotskurn.

1
SVB

Skjöldur Vatnar Björnsson skrifaði
12. janúar 2023 13:03

Hvað er eiginlega í pokahorninu hjá þessari konu?

0
Jack Danielsson skrifaði
12. janúar 2023 12:31

Banki, aka stofnun getur aldrei verið ábyrg fyrir neinu. Það eru alltaf þeir einstaklingar sem stjórna og leggja blessun sína yfir aðgerðir þær sem bankinn er skrifaður fyrir sem eru ábyrgir.
Þá stjórnendur á að draga fyrir dóm.

1
Sigmundur Guðmundsson skrifaði
10. janúar 2023 09:13

Þetta ætti ekki að koma nokkrum manni á óvart.

Enginn mun reynast ábyrgur - frekar en fyrri daginn :-) :-)

1
Anna Thorsteinson skrifaði
9. janúar 2023 23:58

Munum að í skýrslu um bankahrunið kom fram að erlendir fjárfestar voru í langflestum tilfellum íslendingar í skattarskjólum og hinir bankar sem lofað var skjótum gróða ásamt loforði um að geta selt bréfin fljótt aftur og hirt gróðann. Lífeyrissjóðir keyptu svo á hæsta mögulega verði bréfin og lepparnir innan bankanna og lífeyrisjóðanna tóku þátt í þjófnaðinum. Hver skyldi vera foringi ræningjanna nú á dögum þegar Jo Grimson er ekki lengur til staðar

1
Hlynur Jörundsson skrifaði
9. janúar 2023 19:48

Verður það málarmyndarsekt eða alvöru ? Meðalsektin sem hér er vísað í er 8.47 milljónir dollara per mál... sem þýðir að Íslandsbanki ætti að fá um milljarð íslenskar í sekt... ja sei sei... fyrr frýs í helvíti.

Washington D.C., Nov. 15, 2022 —

The Securities and Exchange Commission today announced that it filed 760 total enforcement actions in fiscal year 2022, a 9 percent increase over the prior year. These included 462 new, or "stand alone," enforcement actions, a 6.5 percent increase over fiscal year 2021; 129 actions against issuers who were allegedly delinquent in making required filings with the SEC; and 169 "follow-on" administrative proceedings seeking to bar or suspend individuals from certain functions in the securities markets based on criminal convictions, civil injunctions, or other orders. The SEC’s stand-alone enforcement actions in fiscal year 2022 ran the gamut of conduct, from "first-of-their-kind" actions to cases charging traditional securities law violations.

Money ordered in SEC actions, comprising civil penalties, disgorgement, and pre-judgment interest, totaled $6.439 billion, the most on record in SEC history and up from $3.852 billion in fiscal year 2021. Of the total money ordered, civil penalties, at $4.194 billion, were also the highest on record. Disgorgement, at $2.245 billion, decreased by 6 percent from fiscal year 2021. Fiscal year 2022 was the SEC’s second highest year ever in whistleblower awards, in terms of both the number of individuals awarded and the total dollar amounts awarded.

0

Allar athugasemdir eru ábyrgð á þeirra sem þær skrifa. Heimildin áskilur sér rétt til að fjarlægja ærumeiðandi og óviðeigandi athugasemdir. Hægt er að láta vita af athugasemdum með því að smella á Tilkynna.