Fyrri aukaspurning:

Á myndinni hér að ofan má sjá kvikmyndaleikara einn. Hvað heitir hann?

***

Aðalspurningar:

1.  Hvaða borg kalla Íslendingar gjarnan „borgina við sundið“?

2.  Hvað er Liz Truss að reyna þessa dagana?

3.  Hvað er mörg grömm í einu kílói?

4.  Hvernig bíl bað söngkonan Janis Joplin guð að kaupa handa sér í frægu lagi frá 1971?

5.  Í sama lagi bað Joplin guð líka að kaupa handa sér tvennt annað. Hvað var það? Hér dugar að nefna annað fyrirbærið til að fá stig, en ef þið hafið bæði, þá fáiði sérstakt hippastig.

6.  Hvaða stjórnmálaflokkur fékk næstflest atkvæði í Alþingiskosningunum í fyrrahaust?

7.  Hvaða tvö ríki eru núna á Íberíuskaga — eða Pýreneaskaga?

8.  Ýmislegt hefur gengið á á skaga þessum. Á fimmtu öld eftir Krist birtist þar ný þjóð og lagði í nokkrum áföngum undir sig allan skagann og stofnaði þar ríki sitt. Hvaða þjóð var þetta?

9.  Árið 711 var svo enn einu sinni gerð innrás í þetta ríki og innrásarmennirnir kollvörpuðu þessu ríki og lögðu undir sig nær allan skagann. Hvaðan komu þessir innrásarmenn?

10.  Hveitiakrar þekja samtals ansi stórt svæði í heiminum. En hversu stórt? — gróflega áætlað? Samsvara sameinaðir hveitiakrar heimsins flatarmáli Rússlands — eða Kína — eða Brasilíu — eða Grænlands — eða Frakklands?

***

Seinni aukaspurning:

Hér má sjá hluta af nafni fjölmiðils. Hvaða fjölmiðils?

***

Svör við aðalspurningum:

1.  Kaupmannahöfn.

2.  Að verða forsætisráðherra Breta — og náttúrlega formaður breska Íhaldsflokksins.

3.  Þúsund.

4.  Mercedes Benz.

5.  Litasjónvarp og gott fyllerí, eða hvernig sem þið kjósið að orða það — „a night on the town“ syngur hún. (Athugið að Joplin segir líka við guð: „Prove that you love me,“ en spurningin snýst aðeins um það sem hún biður hann að KAUPA.)

6.  Framsóknarflokkurinn.

7.  Spánn og Portúgal.

8.  Gotar.

9.  Norður-Afríku. Ef einhver vill svara „Arabíu“ eða einhverju þess háttar er það eiginlega ekki rétt, því innrásarmennirnir voru einfaldlega Berbar. En af því ég er umburðarlyndur maður, þá fæst samt stig fyrir „Arabíu“ að þessu sinni.

10.  Hveitiakrarnir samsvara helst flatarmáli Grænlands af þeim löndum sem hér eru nefnd.

***

Svör við aukaspurningum:

Filmstjarnan er Antonio Banderas.

Fjölmiðillinn er franska blaðið Le Monde.