„Það voru efa­semdir um þessa aðferð hjá öllum ráð­herrum,“ sagði Lilja Alfreðs­dóttir við­skipta­ráð­herra á Alþingi í morgun um sölu­með­ferð 22,5 pró­senta hlutar rík­is­ins í Íslands­banka. Vísaði hún þar til þess að bæði Bjarni Bene­dikts­son, efna­hags- og fjár­mála­ráð­herra, og Katrín Jak­obs­dóttir for­sæt­is­ráð­herra, sem sitja ásamt Lilju í ráð­herra­nefnd um efna­hags­mál og end­ur­skipu­lagn­ingu fjár­mála­kerf­is­ins hefðu, hafi haft efa­semdir um að selja hluti rík­is­ins í lok­uðu útboði. 

Hún sagð­ist hafa furðað sig á því að ekki hefði verið farin sama leið og þegar opið útboð fór fram á 35 pró­senta hlut rík­is­ins í bank­anum á síð­asta ári. Þá bauðst öllum almenn­ingi að kaupa hlut í opnu ferli. Útboðið nú síð­ast var aftur á móti lokað og aðeins ætlað svoköll­uðum fag­fjár­festum.

„Þá þótti mér und­ar­legt að við skyldum breyta þeirri aðferð vegna þess að hún gekk vel,“ sagði Lilja. Banka­sýslan hafi hins vegar lagt til breytta aðferð, sem allir ráð­herr­arnir hefðu haft efa­semdir um. „Hún gerir það eftir að hafa ráð­fært sig við sér­fræð­inga, bæði inn­lenda og erlenda,“ sagði hún og bætti við síðar: „Það kann að vera að sú aðferð sem Banka­sýslan lagði til, að hún hafi verið rétt.“

Þessi orð fóru ekki vel í þing­menn stjórn­ar­and­stöð­unnar sem flykkt­ust í ræðu­stól undir liðnum fund­ar­stjórn for­seta sem keppt­ust um að furða sig á orðum ráð­herr­ans. „Þeir sáu ekki ástæðu til að upp­lýsa þingið um þessar áhyggjur sínar […] Létu nægja að vara sjálfa sig við án þess að bóka neitt um það,“ sagði Sig­mundur Davíð Gunn­laugs­son, for­maður Mið­flokks­ins. „Vara ein­dregið við því sem þeir gera en halda þing­inu alveg utan við það.“