Þingflokkur Samfylkingarinnar hefur lagt fram frumvarp sem, ef það yrði samþykkt, myndi gera ráðherrum óheimilt að veita styrki eða framlög síðustu átta vikurnar fyrir kosningar. Í aðdraganda síðustu kosninga veittu ráðherrar margmilljóna styrki til aðgreindra málefna og hrintu úr vör verkefnum sem kosta ríkissjóð miklar fjárhæðir.
Stundin greindi aðgerðir ráðherra í aðdraganda síðustu kosninga og kom þá í ljós að sumir ráðherranna opnuðu veskið sem um munaði. Þannig veitti Svandís Svavarsdóttir, sem þá sat í stóli heilbrigðisráðherra, meðal annars Píeta samtökunum 25 milljóna króna styrk og ráðstafaði 13 milljónum til að efla þjónustu barna- og unglingageðteymis Sjúkrahússins á Akureyri. Katrín Jakobsdóttir forsætisráðherra veitti Samtökunum 78 4 milljóna króna styrk vegna vatnstjóns á húsnæði samtakanna. Ásmundur Einar Daðason, þáverandi félagsmálaráðherra, kom á fót styrktarsjóði fyrir Íþróttasamband fatlaðra upp á 10 milljónir ár hvert til þriggja ára og 75 milljóna króna samning til þriggja ára gerði hann við Píeta samtökin. Enn fleiri dæmi má tína til og er þessi listi alls ekki tæmandi.
Í frumvarpi þingmanna Samfylkingarinnar, til breytinga á lögum um opinber fjármál, er tilgreint að ráðherrum verði óheimilt að veita tilfallandi styrki og framlög til verkefna sem varði málaflokka sem þeir beri ábyrgð á átta vikum fyrir alþingiskosningar. Í greinargerð með frumvarpinu segir að nauðsynlegt sé að tryggja að jafnræði sé sem mest milli framboða í aðdraganda kosninga.
„Sú hætta er fyrir hendi að sitjandi ráðherrar nýti sér forréttindastöðu sína til að afla sér hylli kjósenda hvort tveggja með aðgangi að fjölmiðlum og opinberu fjármagni. [...] Í aðdraganda alþingiskosninga hefur gorið á því að ráðherrar hefji úthlutanir til einstakra mála í stórum stíl allt fram að kjördegi til að vekja athygli á sér og sínu framboði. Telja flutningsmenn það vera ólýðræðislegt að svo sé farið með almannafé og aðstaða sé misnotuð með þessum hætti.“
Athugasemdir