Hér má finna þrautina frá í gær.
***
Fyrri aukaspurning:
Hér að ofan má sjá vænan hluta af málverkinu Kossinum eftir austurrískan málara. Hvað heitir hann?
***
1. Fyrir eitthvað um 2.000 árum var skrifuð á Indlandi bók sem fjallar um hvernig fólk getur notið lífsins. Mesta athygli hefur jafnan vakið sá kafli bókarinnar sem fjallar um unað kynlífsins og allskonar stellingar sem fólk getur brugðið sér í við þá iðju. Hvað nefnist þessi bók?
2. Ragnar í Smára kallaðist atvinnurekandi einn á Íslandi á 20. öld. Hvað var fyrirtækið hans — Smári — frægast fyrir að framleiða?
3. En Ragnar var ekki síður kunnur fyrir menningarstarfsemi. Hvað fékkst hann við á því sviði?
4. Lögreglukonan Katrín rannsakar óvenjulegt morðmál á Íslandi í sjónvarpsþáttunum Brot. Hver leikur hana?
5. Á ofanverðri 16. öld bjó maður, sem hét Izaak að fornafni, í Frankfurt í Þýskalandi. Hann fór þá að kenna sig við húsið sitt þar í borginni, enda voru vanaleg ættarnöfn ekki orðin alsiða meðal Þjóðverja. Hús voru hins vegar kennd við ýmis mislit tákn sem voru máluð utan á þau til að aðgreina þau — þar eð engin húsnúmer voru komin til sögu. Tákn hússins sem Izaak þessi fór að kenna sig við var skjöldur, en í hvaða lit?
6. Hvaða söngkona sendi frá sér lagið Black Parade árið 2020 og tengdi óhikað við mannréttindabaráttu svarta í Bandaríkjunum ?
7. Frá 2007 til 2013 var Indverjinn Viswanathan Anand heimsmeistari í tiltekinni grein, en tapaði þá titli sínum í hendur Norðmanns. Um hvaða grein er að ræða?
8. Í hvaða ríki Bandaríkjanna er stórborgin New York?
9. Hvað nefndist Bretakóngurinn faðir Elísabetar 2. núverandi drottningar? Númer verða að vera rétt.
10. En hvað nefndist Englandskóngurinn sem var faðir Elísabetar 1. drottningar á 16. öld?
***
Síðari aukaspurning:
Þessi kona var nokkuð í sviðsljósinu á samfélagsmiðlum fyrir örfáum vikum. Hvað heitir hún?
***
Svör við aðalspurningum:
1. Kama sutra.
2. Smjörlíki.
3. Bókaútgáfu.
4. Nína Dögg.
5. Skjöldurinn var rauður. Þetta var upphaf Rotschild-ættarinnar.
6. Beyoncé.
7. Skák.
8. New York ríki.
9. Georg 6.
10. Hinrik 8.
***
Svör við aukaspurningum:
Málarinn hét Klimt.
Konan heitir Edda Falak crossfitstjarna og „áhrifavaldur“.
***
Og aftur hlekkur á þrautina frá í gær. Voruði búin að spreyta ykkur á henni?
Athugasemdir