Játning hefur komið upp við rann­sókn lög­regl­unar á morð­inu sem átti sér stað í Rauða­gerði 28 í febr­ú­ar­mán­uði. Þetta kom fram á upp­lýs­inga­fundi lög­regl­unnar á Höf­uð­borg­ar­svæð­inu sem var nú að ljúka. 

Albani hefur játað að hafa orðið Armando Beqiri að bana með því að hafa skotið hann níu sinnum fyrir framan heim­ili sitt. Albaninn sem um ræðir hefur búið hér á landi í sjö ár. 

Menn tengdir skipulagðri brotastarfsemi fluttir til landsins

Fjórtán hafa verið hand­teknir við rann­sókn máls­ins og eru þeir, fyrir utan einn Íslend­ing, frá Albaníu, Rúmeníu, Spáni, Ítalíu, Portúgal, Eist­landi, Serbíu, Lithán og Hvíta- Rúss­landi.

Ein­hverjir þeirra hafa verið búsettir á Íslandi um ein­hvern tíma en ein­hverjir komu til Íslands skömmu áður en morðið var framið en þeir tengj­ast hópum manna í skipu­lagðri brota­starf­semi sem lög­regla hefur til rann­sóknar vegna aðkomu sinnar að mál­inu. 

Morðið var skipulagt

Morðið á Armando var að sögn lög­reglu skipu­lagt og teng­ist að ein­hverju leiti gagna­leka sem upp kom í jan­úar þess efnis að Anton Kristinn Þór­ar­ins­son, einn sak­born­inga, hafi verið upp­lýs­inga­gjafi lög­regl­unar. Lög­reglan vildi þó ekki gefa upp hver væri tal­inn höf­uð­paur máls­ins né hver aðkoma eina Íslend­ings­ins sem hefði stöðu sak­born­ings væri að mál­inu.  

Rannsókn lög­reglu leiddi þó í ljós að hópur manna ætl­aði sér að ráð­ast gegn sak­born­ingi í mál­inu og fjöl­skyldu hans. 

Lögreglan lagði hald á fíkniefni og vopn

Skot­vopnið sem var notað til að skjóta níu sinnum af, fannst fyrir um hálfum mán­uði í sjó. Þá hefur lög­regla einnig fengið heim­ildir til að fara yfir gögn úr  símum og tölvum  ásamt því að fá upp­tökur úr örygg­is­mynda­vélum. Þar að auki hefur lög­regla lagt hald á fíkni­efni og vopn vegna máls­ins. 

Þá kom einnig í ljós á fund­inum að fórn­ar­lambið hafi einnig tengst skipu­lagðri brota­starf­semi.