Krúttpönksveitin BSÍ hefur gefið út tvö lög af fyrstu breiðskífu sinni, Stundum þunglynd … en alltaf andfasísk. Plötunni er skipt upp í tvö ólík þemu; á meðan að „25Lue“ er lokalagið á rólegu ástarsorgarhlið plötunnar er „Dónakallalagið“ orkumikil viðspyrna gegn frekum karlrembum. Platan kemur út 21. maí.
Hljómsveitina skipa tvíeykið Sigurlaug Thorarensen og Julius Pollux Rothlaender, en þau gáfu fyrst út smáskífuna BSÍ árið 2018. Síðan þá hefur sveitin komið fram á mörgum af bestu tónlistarhátíðum landsins og spilað á mótmælatónleikum til stuðnings hælisleitendum. Því ætti ekki að koma á óvart að fyrsta breiðskífa sveitarinnar fjallar um málefni sem eru ofarlega í huga ungra aðgerðarsinna: ástarmál og réttlát reiði í óréttlátu samfélagi.
Þar sem platan er svo tvískipt hefur sveitin ákveðið að gefa út tvö lög í senn til að væta kverkarnar og kitla bragðlaukana hjá almenningi, en með lögunum fylgja líka tónlistarmyndbönd. Sveitin segir að lagið „25Lue“ tilheyri ástarsorgarhlið plötunnar, Stundum þunglynd .... „Það fjallar um ákveðna sátt og ró yfir fortíðinni og því sem áður var, í bland við draumkenndar tilfinningar, ‘80s lo-fi syntha og óljósa von um að sumarið komi fljótt.“ Myndbandinu leikstýrir Ymir Kim.
Lagið „Dónakallalagið“ tilheyrir hinni hlið plötunnar, ... en alltaf andfasísk. Sveitin segir að texti lagsins sé „baráttusöngur gegn þessari hvítu-gagnkynhneigðu-sís-karlkyns-forræðisorku og gegn öllum dónaköllum, sem hafa tekið of mikið rými, kynferðislega áreitt og gengið á mörk annarra – sem við öll erum orðin langþreytt á að þurfa að díla við og viljum útrýma endanlega“. Myndbandinu er leikstýrt af Vilhjálmi Yngva Hjálmarssyni/susan creamcheese.
Platan var samin og tekin upp í Covid-19 faraldrinum, en samhliða því spilaði sveitin á Iceland Airwaves: Live from Reykjavík og Eurosonic hátíðinni í Hollandi. Hún kemur út rafrænt og sem endurunninn vínyll 21. maí, á vegum Tomatenplatten í Berlín og post-dreifingar og Why Not? Plötur í Reykjavík.
Athugasemdir