***
Fyrri aukaspurning.
Þær eru víða blokkirnar. En flestir munu þó átta sig á að blokk eins og sú sem sést á myndinni hér að ofan getur aðeins verið í einni borg. Hver er borgin?
***
Aðalspurningar:
1. Hver eða hverjir sungu fyrir Íslands hönd í Eurovision 1987?
2. Mariana-gjáin, hvað er merkilegt við hana?
3. Á árunum 2003-2004 stýrði Óskar Jónasson gamanþáttum á Stöð 2 þar sem Auddi og Sveppi, Guðlaug Elísabet og Edda Björg, Pétur Jóhann, Sigurjón Kjartansson, Jón Gnarr og fleiri fóru með gamanmál. Þættirnir hétu eftir ákveðnu dýri og ákveðinni matartegund, sem sé ....?
4. „Skaltu það muna, vesall maður, meðan þú lifir að kona hefur barið þig.“ Í hvaða bókmenntaverki falla þessi ódauðlegu orð?
5. Hvað þýðir „deja vu“?
6. Hver er hæsta bygging á Íslandi? Þá teljast ekki með möstur og reykháfar.
7. Hver sér um þáttinn „Á reki“ í Ríkisútvarpinu?
8. Hvaða starfi gegndu feðgarnir Ísleifur Gissurarson og Gissur Ísleifsson fyrstir allra á Íslandi?
9. Sarah Jessica Parker hefur reglulega síðustu áratugi brugðið sér í hlutverk Carrie nokkurrar Bradshaw. Við hvað starfar hin ímyndaða persóna Carrie Bradshaw?
10. Alexis Olympia Ohanian er þriggja ára stúlka. Faðir hennar er einn af stofnendum vefsíðunnar Reddit, en þó hann hafi einu sinni verið kallaður „borgarstjóri internetsins“, þá er mamma Alexis töluvert meira áberandi í bili. Stúlkan ferðast töluvert um heiminn með mömmu sinni — jafnvel á þessum covid-tímum, því móðir stúlkunnar og starfsfélagar hennar ferðast meira þessa mánuði en flestir. Sumir halda því fram að fæðing Alexis litlu hafi truflað móður hennar frá því að verða ótvírætt allra, allra best kvenna í sögunni í sinni grein, en mamman er þó enn að reyna — enda annáluð fyrir þrautseigju og hörku — og er nú stödd í Ástralíu þeirra erinda. Hver er móðir Alexis Olympiu?
***
Síðari aukaspurning.
Myndin hér að neðan er úr vinsælli sjónvarpsseríu sem hefur verið sýnd á Íslandi og víðar öðru hvoru síðustu árin. Hvað heitir hún?
***
Svör við aðalspurningum:
1. Halla Margrét.
2. Dýpsta gjá í sjónum, mesta hafdýpi á jörðinni.
3. Svínasúpan.
4. Gíslasögu Súrssonar.
5. Endurtekningarupplifun, finnast eitthvað hafa gerst áður.
6. Turninn á Smáratorgi í Kópavogi. Hann er 77,6 metra hár, þremur metrum hærri en Hallgrímskirkja.
7. KK.
8. Þeir voru biskupar.
9. Dálkahöfundur, blaðamaður.
10. Serena Williams tennisleikari.
***
Svör við aukaspurningum:
Blokkin er í Hong Kong.
Sjónvarpsserían heitir Babylon Berlin, en þið fáið líka rétt fyrir Berlin Babylon!
***
Spurningaþrautin
Fyrri grein
287. spurningaþraut: Hvar var Hery Martial Rajaonarimampianina Rakotoarimanana forseti?
Næsta grein
Athugasemdir