Ný uppprentun á stjórn­ar­skrár­frum­varpi Katrínar Jak­obs­dóttur for­sæt­is­ráð­herra hefur verið birt á vef Alþingis. Um leið­rétt­ingu er að ræða, en orða­lagi um grein sem talin var hafa áhrif á sam­band lands­réttar og þjóð­réttar hefur verið breytt.

Stundin fjall­aði nýlega um að orða­lagið í þess­ari grein frum­varps­ins gæfi í skyn að alþjóð­legar skuld­bind­ingar færu framar íslenskum lögum. Að mati Bjarna Más Magn­ús­sonar, pró­fess­ors við laga­deild Háskól­ans í Reykja­vík, myndi það marka tíma­mót, enda hafi því almennt verið öfugt farið.

Texti frum­varps­ins hafði breyst frá frum­varps­drögum sem Katrín kynnti síð­asta sumar eftir sam­ráðs­ferli með for­mönnum hinna stjórn­mála­flokk­anna. Talað var í grein­inni um þjóð­rétt­ar­samn­inga „sem valda breyt­ingum á lands­lögum“, en ekki þjóð­rétt­ar­samn­inga „sem horfa til breyt­inga á lands­lögum“ eins og í drög­unum.

„Hér virð­ist gefið til kynna að aðild Íslands að þjóða­rétt­ar­samn­ingi valdi sjálf­krafa breyt­ingum á lands­lögum, frekar en að slík aðild leiði til þess að breyta þurfi lands­lögum með aðgerðum lög­gjafans,“ sagði Bjarni Már í við­tali við Stundina um málið. „Hvorki núgild­andi stjórn­ar­skrá né önnur lög­gjöf inni­heldur almennar reglur um hvernig tengslum lands- og þjóða­réttar er háttað.“

Í nýju uppprent­un­inni er orða­lag­inu hins vegar breytt á ný svo það er sam­hljóða frum­varps­drög­unum frá því síð­asta sumar. 9. grein frum­varps­ins er nú svona: „Lög og mik­il­vægar stjórn­ar­ráð­staf­anir, þar á meðal þjóð­rétt­ar­samn­inga sem horfa til breyt­inga á lands­lögum eða eru af öðrum ástæðum mik­il­vægir, skal bera upp fyrir for­seta í rík­is­ráði.“

Uppprent­unin er merkt sem „leið­réttur texti“. Ekki er tekið fram hvað hafi valdið upp­haf­legu orða­lags­breyt­ing­unni, en engar skýr­ingar á henni voru gefnar í grein­ar­gerð frum­varps­ins.