***
Allar spurningar um sama þema þar eð númer þrautarinnar endar á núlli. Að þessu sinni ber ég niður í Þýskalandi.
Fyrri aukaspurningin:
Þjóðverjar eiga tonn af frábærum tónskáldum fyrr og síðar, en færri myndlistarmenn í allra fremstu röð. Þeir eru þó nokkrir og einn þeirra — sem uppi var um 1500 — málaði þessa sjálfsmynd af sér. Hvað hét hann?
***
Aðalspurningar:
1. Þýskaland er stærra en Ísland. En hve mörgum sinnum stærra, svona gróft séð? Er Þýskaland 2 sinnum stærra, 3,5 sinnum stærra, 5 sinnum stærra eða 7,5 sinnum stærra en Ísland?
2. Hversu margir eru Þjóðverjar, samkvæmt nýjustu tölum? Hér má muna fimm milljónum til eða frá.
3. Hvað gerðist merkilegast og afdrifaríkast til lengri tíma litið í þýskri sögu þann 18. janúar 1871?
4. Claudia Schiffer var sennilega frægasta kona Þýskalands á síðasta áratug síðustu aldar. Hver er hennar atvinna?
5. Angela Merkel er kanslari Þýskalands eins og flestir vita. Fyrir hvað flokk situr hún í embætti?
6. Keppt hefur verið um þýska meistaratitilinn í fótbolta allt frá 1903, að vísu ekki alveg sleitulaust. Flestir vita að Bayern München hefur unnið þýska meistaratitilinn í karlaflokki oftast allra liða, en hvaða lið hefur unnið næstoftast? Það er að vísu meira en hálf öld síðan liðið vann síðast.
7. Berlín er langfjölmennasta borg Þýskalands. Hvaða borg er næst fjölmennust?
8. Hvaða þýskur rithöfundur skrifaði skáldsöguna Tintrommuna?
9. Óteljandi orrustur hafa verið háðar á þýskri grund. Ein sú allra fjölmennasta var háð á þremur dögum í október 1813. Þar sigraði sameinaður her Rússa, ýmissa Þjóðverja og fleiri her Napóleons Frakkakeisara. Þetta varð upphafið að endalokum Napóleons. Við hvaða þýsku borg er þessi örlagaríka orrusta kennd?
10. Þýsku systkinin Sophie Scholl og Hans Scholl stóðu á sínum tíma fyrir hópi sem kallaðist Hvíta rósin. Fyrir starf Hvítu rósarinnar voru þau dregin fyrir dóm, dæmd til dauða og afhöfðuð. En hverju helgaði Hvíta rósin sig, sem yfirvöldum fannst svo hættulegt?
***
Seinni aukaspurning:
Hvað heitir þessi þýska listakona?
***
Svör við aðalspurningum:
1. Þýskaland er um það bil 3,5 sinnum stærra en Ísland.
2. 83 milljónir, svo rétt telst vera allt frá 78 til 88.
3. Þýskaland sameinaðist — að mestu. „Keisaradæmi stofnað“ er ekki fullnægjandi, þar sem sérstaklega er spurt um atburð er hafði langvarandi afleiðingar. Keisaradæmið stóð jú „aðeins“ í 45 ár eða svá.
4. Fyrirsæta.
5. Kristilega demókrata.
6. Nürnberg.
7. Hamborg.
8. Grass.
9. Leipzig.
10. Andstöðu við nasisma og Hitler.
***
Svör við aukaspurningum:
Á efri myndinni er Dürer.
Á neðri myndinni er Nina Hagen.
***
Spurningaþrautin
Fyrri grein
259. spurningaþraut: Að hverju leitar SETI og hver var Jan Janszoon?
Næsta grein
Athugasemdir