Jú, alveg rétt: Hér er hlekkur á þraut gærdagsins. Mig minnir að þú eigir hana eftir.
***
Aukaspurning sú hin fyrri:
Við hvaða tækifæri var myndin hér að ofan tekin?
***
Aðaspurningar:
1. Margaret Mitchell var rithöfundur og einn sá vinsælasti í heimi, en bara út á eina bók, því fleiri gaf hún ekki út um sína daga. Hvað hét þessi vinsæla bók Mitchell?
2. Hver skrifaði söguna Sunnudagskvöld til mánudagsmorguns?
3. Hvar á landinu er Reykhólasveit?
4. Bandarískt tónskáld heitir Philip Glass. Íslenskur tónlistarmaður gaf fyrir nokkrum misserum út túlkun sína á verkum hans. Hver er tónlistarmaðurinn?
5. Quetzalcoatl hét guð einn. Hvar í veröldinni var hann í hávegum hafður. Svarið þarf að vera þokkalega nákvæmt.
6. Hversu hár er Hvannadalshnjúkur? Skekkjumörk eru 2 metrar til eða frá.
7. Í hvaða landi var Friðrik mikli konungur á árunum 1740-1786?
8. Jan Janszoon var hollenskur maður er fæddist í Haarlem árið 1575. Hann gerðist sjómaður á unga aldri. Hver eru tengsl Jan Janszoons við íslenska sögu?
9. SETI heitir stofnun ein, sem komið var á koppinn árið 1984 og hefur unnið að markmiðum sínum sleitulaust síðan. Markmiðin felast í leit að tilteknu fyrirbrigði, sem ekki hefur fundist ennþá, og sumir eru reyndar hálfsmeykir við tilhugsunina ef það myndi nú finnast. En í reynd efast þó fáir um að þetta sé til og sennilega mjög víða. Að hverju er SETI að leita?
10. Árið 1929 varð hinn núverandi Sjálfstæðisflokkur til við sameiningu Frjálslynda flokksins og ... hvað hét hinn flokkurinn?
***
Seinni aukaspurning:
Húsið á myndinni hér að neðan var aldrei reist. Hvaða hús er þetta?
***
Svör við aðalspurningum:
1. Gone With the Wind, eða Á hverfanda hveli.
2. Ásta Sigurðardóttir.
3. Á Vestfjörðum.
4. Víkingur Heiðar.
5. Mið-Ameríku.
6. Hnjúkurinn mælist vera 2,109.6 metrar, svo rétt dæmist vera 2.107-2.112.
7. Prússlandi. Þýskaland er að sjálfsögðu ekki rétt.
8. Hann var einn af leiðtogum hins svonefnda Tyrkjaráns. Nóg er að kannast við Tyrkjaránið, annað skiptir ekki máli í þetta sinn.
9. Lífi í alheiminum, geimverum.
10. Íhaldsflokkurinn.
***
Svör við aukaspurningum:
Á efri myndinni kveður Nixon Bandaríkjaforseti Hvíta húsið 1974 eftir að hafa neyðst til að segja af sér. „Afsögn“ og „Nixon“ dugar.
Á neðri myndinni er stöðvarhús vatnsaflsvirkjunar sem fossafélagið Títan hugðist reisa við Urriðafoss í Þjórsá. Hér er nóg að vita að málið snýst um „virkjun“ og nefna þarf annaðhvort Títan eða Einar Benediktsson, frumkvöðul félagsins.
***
Og ef þú átt þraut gærdagsins enn eftir, þá er hér aptur hlekkur á hana.
Spurningaþrautin
Fyrri grein
258. spurningaþraut: Hvaða hvalategund liggur þarna í Dýrafjarðarfjöru?
Næsta grein
Athugasemdir